लाडक्या बहिणीच्या श्रेयाचा वाद कायम? ओवाळणी म्हणून मतांची परतफेड होईल का?

महायुती सरकारनं प्रचारात सर्वाधिक भर ज्या लाडकी बहीण योजनेवर दिला आहे. त्यावरुन अद्यापही श्रेयवादाचा सिलसिला थांबलेला नाही. याआधी अजित पवार आपल्या कार्यक्रमांमध्ये मुख्यमंत्री लाडकी बहीण योजनेचं नाव मुख्यमंत्री शब्द वगळून करत होते. त्यानंतर आता महाराष्ट्र भाजपनं विविध वर्तमानपत्रांत दिलेल्या जाहिरातीतही मुख्यमंत्री शब्द गायब असून महायुती आणि फडणवीसांचा फोटो प्रसिद्ध झाला आहे. भाजपच्या जाहिरातीत आधार लाडक्या बहिणीला, आशीर्वाद महायुतीला. महायुती शासित महाराष्ट्रात लाडकी बहीण योजना यशस्वी असं म्हणत 4 हफ्ते जमा झाल्याचा उल्लेख आहे. मात्र यातून योजनेतील नावाचा मुख्यमंत्री शब्द गायब आहे.

दुसरीकडे जळगावात भाजपनंच लावलेल्या लाडकी बहिणीच्या बॅनरमध्येही फडणीस-शिंदेंचा फोटो असून तिथून अजित पवारांचा फोटो हटवण्यात आला आहे, शिवाय या बॅनरवर शिंदेंचा फोटो असला तरी योजनेतील मुख्यमंत्री शब्द वगळण्यात आला आहे.

काही दिवसांपूर्वी लाडकी बहिण योजनेच्या श्रेयाचा वाद रंगल्यानंतर अजित पवारांच्या कार्यक्रमातल्या बॅनरमध्ये बदल झालेला दिसतोय. याआधी फक्त लाडकी बहिण योजनेचे बॅनर होते. ते आता मुख्यमंत्री लाडकी बहिण योजना म्हणून झळकू लागले आहेत. विशेष म्हणजे शिवसेनेचे मुखपत्र दैनिक सामना विद्यमान सरकारला बेकायदेशीर म्हणत असलं., तरी त्याच सरकारच्या जाहिराती मात्र सामनातल्या वर्तमानपत्रातही छापून येत आहेत. त्यावरुन भाजपनं ठाकरे गटाला सवाल केलाय.

घटना बाह्य सरकार म्हणायचं आणि त्याच सरकारची सामनाच्या पहिल्या पेज वर जाहिरात लावायची आणि पैसे घ्यायचे कितीही शेमड्या सारखे रडलात तरी तुम्ही थांबवू शकत नाही अशी टीका केली आहे. दरम्यान भाजपच्या जाहिरातीत तेलंगणा, हिमाचल आणि कर्नाटकात काँग्रेसनं लाडक्या बहि‍णींना आश्वासन देवून फसवल्याचा दावा करत काँग्रेसवर भूमिकेवर सवाल केलाय. विरोधकांनी मात्र या दाव्यांना खोटं ठरवलं आहे.

लाडक्या बहिण योजनेतून सरकारनं बहि‍णींना दिलेल्या ओवाळणी मतांची परतफेड करेल का, हे निकालच ठरवणार आहे. पण या घडीला महागाई आणि लाडकी बहिणीवरुन लोकांच्या संमिश्र प्रतिक्रिया आहेत.