Maharashtra News LIVE : भोंदूबाबा अशोक खरातच्या अघोरी कृत्यांचा धक्कादायक खुलासा
Meta Description: भोंदू बाबा अशोक खरात प्रकरणाची कसून चौकशी सुरु आहे. तर दुसरीकडे इराण-इस्त्रायल युद्धामुळे जागतिक इंधन संकट उद्भवले आहे. ठळक बातम्यांचे अपडेट्स या लाईव्ह ब्लॉगमध्ये वाचू शकता.
LIVE NEWS & UPDATES
-
भोंदू अशोक खरात प्रत्येक शनिवारी आणि रविवारी मिरगाव येथील फार्म हाऊसवर
मिरगाव परिसरात अनेक वर्षे दहशत निर्माण केल्याचा आरोप…सकाळी दहा ते बारा किलोमीटर सायकलिंग करत होता. सायकलिंग करतेवेळी कंबरेला बंदूक लावून फिरत असल्याची स्थानिकांची माहिती…दहशतीच्या जोरावर शेतकऱ्यांच्या जमिनी बळकावल्या, खोटे गुन्हे दाखल केल्याचेही आरोप…तर कालच त्याच्या फॉर्म हाउस येथील वॉचमन, कर्मचारी, मंदिराच्या पुजाऱ्याची चौकशी करण्यात आली
-
खरातचा विषय अधिवेशनात गाजण्याची शक्यता
नाशिकचा भोंदूबाबा खरात याचा मुद्दा अधिवेशनात गाजण्याची शक्यता आहे. घरात याच्या विरोधात तक्रार करण्याकरिता अनेक महिला पुढे आल्या आहेत.
-
-
नवापूर शहरात धक्कादायक घटना
नवापूर शहरात एक अनोखी आणि चर्चेचा विषय ठरलेली घटना समोर आली आहे. बस स्थानकासमोर असलेल्या एका निंबाच्या झाडातून गेल्या दोन ते तीन दिवसांपासून अगरबत्तीप्रमाणे धूर निघत असल्याचे पाहायला मिळत आहे. या घटनेमुळे नागरिकांमध्ये कुतूहलाचे वातावरण निर्माण झाले असून, काहीजण याकडे दैवी चमत्कार म्हणून पाहत आहेत. झाडाच्या शेंड्याकडून अचानक धूर निघताना दिसल्याने परिसरात नागरिकांची मोठी गर्दी झाली. अनेकांनी श्रद्धेने या घटनेकडे पाहत दर्शनासाठीही गर्दी केली. मात्र, यामागे वैज्ञानिक कारण असल्याची शक्यता देखील वर्तवली जात आहे. परंतु झाडाच्या बुंध्याजवळ बाबाचा दर्गा असून, तेथे नियमितपणे दिवाबत्ती आणि अगरबत्ती लावली जाते. याच आगीमुळे झाडाच्या आतील भागात हळूहळू आग लागून ती काही दिवस साचत राहिली आणि अखेर शेंड्याकडून धूर बाहेर येऊ लागला, असा अंदाज व्यक्त केला जात आहे.
-
नाशिकच्या भोंदू अशोक खरात प्रकरणात मोठी अपडेट
शिवनिका संस्थानच्या ट्रस्टींचीही चौकशी होणार असल्याची सूत्रांनी माहिती दिली आहे. संस्थानचे अध्यक्षपद भोंदू अशोक खरातकडे होते. काही वर्षांपूर्वी जुन्या ट्रस्टींनी साथ सोडल्यानंतर नव्या विश्वस्तांची नियुक्ती केली होती. खरातने पत्नी आणि निकटवर्तीयांना विश्वस्तपदी बसवले होते. रुपाली चाकणकरही या संस्थानवर ट्रस्टी होत्या. विश्वस्त मंडळाची मुदत ऑगस्ट २०२५ मध्येच संपल्याचा खुलासा रुपाली चाकणकर यांनी केला होता. खरात अटकेत गेल्यानंतर विश्वस्त मंडळाचा फलकही गायब झाला आहे. SIT कडून संबंधित ट्रस्टींना चौकशीसाठी बोलावण्याची शक्यता वर्तवण्यात येत आहे. मंदिर संस्थानमधील कारभार आणि आर्थिक व्यवहारही तपासाच्या रडारवर आहेत.
-
सोलापुरात प्रियकर आणि महिलेने केलेल्या सामूहिक बलात्काराची तक्रार खोटी ठरली
तक्रारदार महिला आणि प्रियकराचा कट पोलिस तपासात उघड झाल्याने दोघांवर गुन्हा दाखल करण्यात आला. यापूर्वी आरोपी प्रियकरावर दाखल असलेल्या गुन्ह्यातील फिर्यादीवर दबाव आणण्यासाठी हा बनाव रचला होता. यामध्ये आरोपी प्रियकर आणि प्रेयसीने डायल 112 वर कॉल करून माझ्यावर सामूहिक बलात्कार झाल्याची खोटी माहिती पोलिसांना दिली. त्यानंतर पोलिसांनी सीडीआर तसेच सीसीटीव्हीची तपासणी केली असता ही घटना घडली नसल्याचे निष्पन्न झाले. त्यानंतर आरोपी प्रियकर आणि महिलेवर भारतीय न्याय संहिता कलम 248, 217, 61(2) अंतर्गत गुन्हा दाखल करुन अटक करण्यात आली. विजापूर नाका पोलिसांनी ही कारवाई केली आहे.
-
-
राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्याकडून आज मवीआ आमदारांसोबत डिनर डिप्लोमेसी
शरद पवार यांची मवीआ कडून राज्यसभा खासदार म्हणून निवड केल्याच्या निमित्ताने आभार प्रकट करण्यासाठी या डिनर डिप्लोमेसी चा आयोजन करण्यात आल आहे. आज संध्याकाळी ७ वाजता यशवंतराव चव्हाण सेंटर मध्ये डिनर डिप्लोमेसीचा आयोजन करण्यात आलं. या डिनर डिप्लोमेसी मध्ये काही राजकीय चर्चा होणार का हे पाहण महत्वाच आहे…
-
तुळजाभवानी मातेचा चैञ पोर्णिमा उत्सव ३० मार्च ते ३ एप्रिल या कालावधीत होणार साजरा
साडेतीन शक्तीपीठापैकी एक असलेल्या आई तुळजाभवानी मातेचा चैञ पोर्णिमा उत्सव ३० मार्च ते ३ एप्रिल या कालावधीत साजरा होणार आहे. या अनुषंगाने मंदिर संस्थानच्या वतीने जय्यत तयारी केली जात आहे. या कालावधीत तीन दिवस तुळजाभवानी मंदीर २२ तास दर्शनासाठी खुले राहणार आहे. तर ३१ मार्च ते २ एप्रिल कालावधीत मंदीरात छबिन्याचे मुख्य आकर्षण असणार आहे. चैञ उत्सव कालावधीत राज्यभरासह कर्नाटक, आंध्र प्रदेश, तेलंगणा या राज्यातून मोठ्या संख्येने भाविक दर्शनासाठी येत असतात.
-
-
भोंदू बाबा अशोक खरात आणि पोपटराव पवार यांच्या व्हायरल व्हिडिओ नंतर पोपटराव पवारांचा खुलासा
भोंदू बाबा अशोक खरात आणि पोपटराव पवार यांच्या व्हायरल व्हिडिओ नंतर पोपटराव पवारांनी मोठा खुलासा केला आहे. 2012 साली हिवरे बाजार येथील मंदिराच्या जिर्णोद्धराचे जे काम हाती घेतले त्याच कामगारांनी अशोक खरातच्या ईशान्येश्वराच्या मंदिराचे काम केले. त्यामुळे घराचा संपर्क आला होता, त्यानंतर कुठलाही संबंध आला नाही. मंदिराच्या व्यतिरिक्त कुठलाही संबंध आला नाही, भोंदूगिरीशी आमचा कुठलाही संबंध नाही…
-
श्री तुळजाभवानीला ‘वारा घालण्याच्या’ पारंपरिक सेवेची सुरुवात
श्री तुळजाभवानी मंदिर येथे उन्हाळ्याच्या पार्श्वभूमीवर देवीस उष्णतेचा त्रास होऊ नये म्हणून ‘पंख्याने वारा घालण्याची’ पारंपरिक सेवा सुरू करण्यात आली आहे. दरवर्षीप्रमाणे यंदाही ही सेवा चैत्र महिन्यापासून दुपारी 1 ते 4 या वेळेत हाताने पंखा हलवून सेवा करण्यात येते. देवीला लिंबू सरबत, फळे व पेढ्यांचा नैवेद्य अर्पण करून मखमली पंख्याचा वापर ही मानाची सेवा पारंपरिकरित्या तुळजापूरातील पलंगे कुटुंबाकडे असून, अनेक पिढ्यांपासून ती अखंड सुरू आहे. मृग नक्षत्रातील पावसाळा सुरू होईपर्यंत ही सेवा चालणार आहे.
-
शिंदे शिवसैनिकाची ठाकरे यांचे आमदार सिद्धार्थ खरात यांना थेट धमकी
बुलढाणा जिल्ह्याच्या मेहकर शहरात सध्या राजकीय वातावरण चांगलेच तापले असून, शिंदे यांच्या शिवसेना चे एका शिवसैनिकाने पत्रकार परिषदेत अत्यंत आक्रमक आणि वादग्रस्त भाषा वापरत ठाकरे गटाचे आमदार सिद्धार्थ खरात यांना थेट धमकी दिल्याचा प्रकार समोर आला आहे.. “कोणीही असू द्या, आमदारालाही ओढून मारू,” असे धक्कादायक वक्तव्य केल्याने परिसरात मोठी खळबळ उडाली आहे.. सदर पत्रकार परिषदेत बोलताना संदीप तठ्ठे यांनी आपल्या शिंदे सेनेचे माजी आमदार संजय रायमुलकर यांच्या कामाचे श्रेय इतरांनी घेऊ नये, अन्यथा गंभीर परिणामांना सामोरे जावे लागेल, असा इशारा दिला आहे .. “आमच्यावर आधीच २५-२५ गुन्हे दाखल आहेत, त्यामुळे आम्ही कोणालाही घाबरत नाही,” असेही त्यांनी स्पष्टपणे म्हटले. या भडक वक्तव्यामुळे मेहकरमधील राजकीय वातावरण अधिकच तापले आहे… या प्रकरणी प्रशासन कोणती भूमिका घेते, याकडेही सर्वांचे लक्ष लागले आहे.. दरम्यान, या वादग्रस्त वक्तव्याचे पडसाद पुढील काही दिवसांत अधिक तीव्र होण्याची शक्यता व्यक्त केली जात आहे.
-
धुळे शहरातील पवन नगर हुडको येथे पोलिसांची कारवाई..
धुळे शहरातील पवन नगर हुडको येथे पोलिसांनी कारवाई केली आहे. मध्यरात्री पोलिसांच्या केलेल्या कारवाईत 500 किलो गांजा जप्त केला आहे. स्थानिक गुन्हे अन्वेषण शाखा आणि चाळीसगाव रोड येथे पोलिसांनी कारवाई केली आहे. पवन नगरातील अत्यंत लहान घरामध्ये खोक्यामध्ये पॅक केलेला गांजा आढळला. तब्बल पाचशे किलो गांजा पकडणारे तस्करी करणाऱ्यांमध्ये खळबळ उडाली आहे.
-
सिलेंडर तुटवड्यामुळे रॉकेल पुरवठा सुरू करण्याचे धोरण , बंद झालेले रॉकेल पुन्हा सुरू होणार
युद्धजन्य परिस्थितीमुळे निर्माण झालेल्या सिलेंडर तुटवड्याच्या पार्श्वभूमीवर धाराशिव जिल्ह्यात प्रशासनाकडून ग्रामीण भागात रॉकेल पुरवठा करण्याचा निर्णय घेण्यात आला आहे. नवीन धोरणानुसार ग्रामीण भागात 45 दिवस घरगुती गॅस सिलेंडर उपलब्ध होणार नाही त्यामुळे नागरिकांची गैरसोय टाळण्यासाठी रॉकेल पुरवठा करण्याचा निर्णय घेण्यात आला आहे. जिल्ह्यातील अंत्योदय आणि प्राधान्य असलेल्या सुमारे 7 लाख 24 हजार कुटुंबांना रॉकेल पुरवठा होणार. जिल्हा पुरवठा विभागाकडून पात्र लाभार्थ्यांची माहिती गोळा करण्याचे काम सुरू झालं आहे. आज जिल्हा प्रशासन आणि राज्य पुरवठा विभाग यांच्यात कॉन्फरन्सद्वारे अंतिम धोरण निश्चित होणार आहे.
-
KDMC स्थायी समिती सभापतीपदासाठी शिवसेनेत जोरदार रस्सीखेच
KDMC मध्ये स्थायी समिती सभापती पदासाठी ‘काटे की टक्कर’ पाहायला मिळत आहे. सभापती शर्यतीत शेट्टी–म्हात्रे–भोईर गायकवाड आमनेसामने उभे असून ‘लाडकी बहीण’ ठरणार गेमचेंजर? मल्लेश शेट्टी, विकास म्हात्रे, जयवंत भोईर यांची थेट स्पर्धा रंगणार आहे. महेश गायकवाड यांचाही युवा चेहरा म्हणून दावेदारीत सहभाग आहे. सर्व इच्छुकांनी प्रतिष्ठा पणाला लावत लॉबिंगला सुरुवात केली आहे. ठाणे, मुंबई ते दिल्लीपर्यंत भेटीगाठींना वेग आलं आहे. मात्र पुरुषांची रस्सीखेच पाहता नाराजी टाळण्यासाठी KDMC मध्ये ‘लाडकी बहीण’ म्हणून विजया पोटे नाव चर्चेत आहे. अंतिम निर्णय उपमुख्यमंत्री एकनाथ शिंदेंकडे आहे… असं सूचक विधान खासदार श्रीकांत शिंदे यांनी केलं आहे.
नाशिकमध्ये भोंदू अशोक खरातच्या अघोरी कृत्यांचा धक्कादायक खुलासा झाला आहे. मंदिर परिसरात नकली साप आणि वाघाचे कातडे ठेवून भीतीचं वातावरण निर्माण करायचा. रिमोट कंट्रोल सापाच्या हालचालींनी चमत्कार दाखवत लोकांची फसवणूक करायचा. संमोहन आणि अघोरी विधींच्या नावाखाली भाविकांकडून पैशांची उकळपट्टी करायचा. भोंदूबाबा बाजारात स्वस्त मिळणारे रानटी चिंचोके पॉलिश करून महागात विक्री करायचा. 100 रुपयांच्या वस्तूला 10 हजार ते 1 लाखांपर्यंत विक्री करत गंडवायचा. नकली खडे आणि रत्ने दैवी असल्याचा दावा करत विक्री करायचा. तर डोंबिवली निळजे परिसरातील धक्कादायक घटना समोर आली आहे. कर्जवसुलीसाठी गेलेल्या बँक अधिकाऱ्यांना कर्जदार आणि साथीदारांकडून बेदम मारहाण करण्यात आली. रक्तबंबाळ करून 19 व्या मजल्यावर अधिकाऱ्यांना नेऊन कोंडून ठेवत धमक्या दिल्याचा प्रकार घडला आहे. मानपाडा पोलीस ठाण्यात गुन्हा दाखल करण्यात आला असून, पोलिसांनी तत्काळ कारवाई करत आरोपींना घेतलं आहे. दुसरीकडे जळगावच्या जैनाबाद परिसरात 500 रुपये न दिल्याने तरुणावर धारदार शस्त्राने जीवघेणा हल्ला करण्यात आला आहे. धारदार शस्त्राने वार केल्याने तरुणाचे आतडे बाहेर निघाले असून त्याच्यावर उपचार सुरु आहेत. नितीन नाना काळे 35 वर्षीय जखमी तरुणाचे नाव आहे.. यासह देश विदेश, मनोरंजन, क्रीडा, क्षेत्रासह राज्यातील ठळक बातम्यांचे अपडेट्स या लाईव्ह ब्लॉगमध्ये वाचू शकता.
Published On - Mar 23,2026 8:04 AM
