महायुतीच्या जागावाटपात नवा ट्विस्ट!; छगन भुजबळ लोकसभा निवडणूक लढण्याच्या तयारीत?

लोकसभा निवडणुकीसाठीचं महायुतीचं जागावाटप अद्याप झालेलं नाही. भाजपने जरी काही जागांवरील उमेदवार जाहीर केले असले तरी काही जागांवरचा तिढा अद्याप कायम आहे. अशातच महायुतीच्या जागा वाटपात नवा ट्विस्ट आल्याचं पाहायला मिळतंय. छगन भुजबळ लोकसभा निवडणूक लढण्याच्या तयारीत असल्याची माहिती आहे. भुजबळांकडून लोकसभेची चाचपणी केली जात आहे. भाजप आणि शिंदे गटाच्या वादात नशिकच्या जागेची राष्ट्रवादीकडून चाचपणी केली जात आहे. छगन भुजबळ आणि भाजप नेत्यांमध्ये चर्चा सुरु असल्याची माहिती आहे.

नाशिकच्या जागेवरून तिढा कायम

सध्या शिवसेनेचे नेते हेमंत गोडसे हे नाशिकचे खासदार आहेत. पुन्हा उमेदवारी मिळावी म्हणून ते आग्रही आहेत. तर मुख्यमंत्री एकनाथ शिंदे यांचे पुत्र, खासदार श्रीकांत शिंदे यांनी काही दिवसांआधी बोलताना हेमंत गोडसे हेच महायुतीचे उमेदवार असतील अशी घोषणा केली. त्यांनंतर महायुतीतील विशेषत: भाजपचे नेते, कायकर्ते नाराज झाले होते. भाजपचे नेते, माजी नगरसेवक दिनकर पाटील यांनी गोडसे यांच्या उमेदवारीला विरोध केला आहे. त्यामुळे नाशिकच्या जागेवरून महायुतीत तिढा कायम असल्याचं पाहायला मिळतंय. शिवाय आता छगन भुजबळदेखील निवडणूक लढण्यासाठी चाचपणी करत असल्याची माहिती आहे.

भुजबळांकडून मतदारसंघात चाचपणी सुरू

नाशिकच्या जागेवरून महायुतीतील संबंध ताणले गेलेले असतानाच आता एक नवा ट्विस्ट आला आहे. छगन भुजबळ यांच्याकडून मतदारसंघात चाचपणी केली जात आहे. मध्यंतरी झालेल्या मराठा आंदोलनातील छगन भुजबळांची भूमिका चर्चेचा विषय ठरली होती. ओबीसीमधून मराठा समाजाला आरक्षण देण्यास त्यांनी विरोध केला होता. त्यांच्या या भूमिकेचा काय परिणाम होऊ शकतो? जर भुजबळ या ठिकाणी निवडणुकीला उभे राहिले तर मराठा आरक्षणाबाबतच्या त्यांच्या भूमिकेचा फायदा होणार की तोटा? याची चाचपणी सध्या सुरु आहे.

नेमकं काय घडणार?

छगन भुजबळ आणि त्यांच्या टीमकडून नाशिक मतदारसंघात चाचपणी केली जात आहे. त्यामुळे जर या ठिकाणी सकारात्मक स्थिती दिसली. तर मात्र राष्ट्रवादीकडून उमेदवारीची मागणी केली जाऊ शकते. भाजप आणि शिंदे गटा वाद असतील तर आम्ही या ठिकाणाहून लढतो, अशी भूमिका अजित पवार गट घेऊ शकतो. दरम्यान, या सगळ्याबाबत छगन भुजबळ यांनी मात्र अधिकृत प्रतिक्रिया दिलेली नाही.