‘मी कस्टडीत जाईन, पण…’, राजन साळवींनी दंड थोपटले, ACB च्या कारवाईवर मोठं वक्तव्य
ठाकरे गटाचे आमदार राजन साळवी यांच्याविरोधात एसीबीकडून छोपेमारी करण्यात आली आहे. एसीबीकडून आज सकाळीच साळवी यांच्या घरी छापा टाकण्यात आला. साळवी यांच्या घरी एसीबीच्या पथकाकडून आज सकाळी आठ वाजेपासून झाडाझडती सुरु आहे. एसीबीच्या छाप्यानंतर ठाकरे गटाचे कार्यकर्ते साळवी यांच्या घराच्या बाहेर जमले आहेत. यावेळी साळवी देखील कार्यकर्त्यांना भेट देत आहेत. साळवी यांनी यावेळी 'टीव्ही 9 मराठी'ला प्रतिक्रिया दिली.
मनोज लेले, रत्नागिरी | 18 जानेवारी 2024 : ठाकरे गटाचे आमदार राजन साळवी यांच्याविरोधात बेनामी संपत्ती प्रकरणी गुन्हा दाखल करण्यात आला आहे. राजन साळवी यांनी साडेतीन कोटी रुपयांची बेनामी संपत्ती जमा केल्याचा आरोप करण्यात आलाय. राजन साळवी यांच्याविरोधात आज सकाळपासून एसीबीची छापेमारी सुरु आहे. एसीबीने आज सकाळी राजन साळवी यांच्या घरी, त्यांच्या भावाच्या घरी आणि हॉटेलवर धाड टाकली. त्यानंतर त्यांच्याविरोधात बेनामी संपत्ती प्रकरणी गुन्हा दाखल करण्यात आलाय. एसीबीकडून गेल्या 8 तासांपासून राजन साळवी यांच्या घरी झाडाझडती सुरु आहे. असं असलं तरी राजन साळवी अटकपूर्व जामिनासाठी अर्ज करणार नाहीत, असं त्यांनी सांगितलं आहे. पोलीस कस्टडीत राहण्याची माझी तयारी आहे, असं राजन साळवी म्हणाले आहेत.
राजन साळवी यांनी ‘टीव्ही 9 मराठी’ला प्रतिक्रिया दिली. “आतापर्यंत माझ्या चार ठिकाणच्या प्रॉपर्टीचं मोजमाप झालेलं आहे. आता माझ्या मूळ घरात अधिकाऱ्यांची टीम आहे. त्यांच्याकडून झाडाझडती सुरु आहे. त्यानंतर गुन्हा दाखल होईल, असं वाटतं. पण मला ठोस माहिती नाही. पण त्यांनी दिलेल्या माहितीनुसार, मी, माझी पत्नी आणि माझ्या मुलावर गुन्हा दाखल केल्याचं समजत आहे”, अशी प्रतिक्रिया राजन साळवी यांनी दिली.
‘उद्धव ठाकरेंनी फोन करुन विचारपूस केली’
“शिवसेना पक्षप्रमुख उद्धव ठाकरे हे आमचे कुटुंबप्रमुख आहेत. आमच्यावर ज्या-ज्या वेळेला प्रसंग येतो त्यावेळी ते कुटुंबप्रमुख म्हणून पाठिशी उभे असतात. त्यांनी आज सकाळपासून दोनवेळा मोबाईलवर फोन करुन विचारपूस केली आहे. त्यांनी मला ठामपणे सांगितलं आहे की, राजन घाबरायचं कारण नाही. आम्ही तुझ्यापाठिशी शिवसेना आणि ठाकरे कुटुंब म्हणून खंबीरपणे उभे आहोत”, असं राजन साळवी यांनी सांगितलं.
‘माझा छापेमारीबद्दलच आक्षेप’
“माझा छापेमारीबद्दलच आक्षेप आहे. छापेमारी करायला मी गुंड आहे का? ही चौकशी आहे. मी सामोरं जातोय. जे व्हायचं ते होईल. ते त्यांची कायदेशीर कारवाई करणार आहेत. माझ्यासोबत माझे सहकारी आहेत. माझे सहकारी जामीनासाठी न्यायालयात अर्ज करतील. मला न्यायालयात निश्चित न्याय मिळेल. मला ताबोडतोब जामीन मिळेल, असं वाटतं”, अशी प्रतिक्रिया साळवी यांनी दिली.
