थिएटर्समध्ये बाहेरचं खाणं न्यायला खरंच अडवू शकतात का? अनेकांना हा नियम माहीतच नाही!
चित्रपटगृहात बाहेरचे खाणे आत घेऊन जाता येते का? मल्टिप्लेक्सचे नियम आणि प्रेक्षकांचे कायदेशीर अधिकार काय आहेत, याबद्दल सविस्तर माहिती जाणून घ्या या लेखात.
चित्रपट पाहायला जाणे हा अनेकांचा वीकेंडचा किंवा सुट्टीचा एक आवडता प्लॅन असतो. पण थिएटरमध्ये जाताना आपल्याला कायम एक प्रश्न पडतो आणि तो म्हणजे चित्रपटगृहात बाहेरचे खाणे आत घेऊन जाता येईल का? बऱ्याचदा मल्टिप्लेक्सचे सुरक्षा रक्षक बॅग तपासतात आणि सोबत आणलेले खाद्यपदार्थ किंवा पाण्याच्या बाटल्या बाहेरच ठेवायला लावतात. यावरून अनेकदा वादही होतात. पण खरंच याबाबत काही स्पष्ट कायदा आहे का? की हा केवळ चित्रपटगृह मालकांचा मनमानी कारभार आहे? याबद्दल आज आपण जाणून घेऊया.
1 / 6
भारतात चित्रपटगृहांमध्ये बाहेरचे खाद्यपदार्थ आणण्यास सरसकट मनाई करणारा कोणताही केंद्रीय किंवा राष्ट्रीय कायदा नाही. बहुतेक मल्टिप्लेक्स आणि सिंगल स्क्रीन थिएटर्स स्वतःचे नियम बनवतात. जेव्हा तुम्ही सिनेमाचे तिकीट खरेदी करता, तेव्हा तुम्ही त्यांचे नियम व अटी (Terms and Conditions) मान्य केल्या आहेत, असे गृहीत धरले जाते.
2 / 6
सुरक्षेच्या कारणास्तव आणि थिएटरमध्ये अस्वच्छता पसरू नये म्हणून व्यवस्थापनाला काही निर्बंध घालण्याचा अधिकार न्यायालयाने दिला आहे. चित्रपटगृहे प्रेक्षकांना मोफत पिण्याचे पाणी नाकारू शकत नाहीत. प्रत्येक थिएटरमध्ये पिण्याच्या पाण्याची स्वच्छ आणि मोफत सोय असणे कायद्याने बंधनकारक आहे.
3 / 6
जर तुमच्यासोबत लहान बाळ असेल (ज्यांचे दूध किंवा अन्न बाहेरून आणावे लागते) किंवा कुटुंबात वृद्ध, मधुमेह (Diabetes) आणि इतर वैद्यकीय समस्या असलेले रुग्ण असतील, तर त्यांच्यासाठी आवश्यक खाद्यपदार्थ नेण्याची परवानगी दिली जाते.
4 / 6
चित्रपटगृहांमध्ये मिळणारे पॉपकॉर्न, समोसे किंवा कोल्ड ड्रिंक्स 'एमआरपी' (MRP) पेक्षा कितीतरी पटीने महाग असतात. सर्वसामान्यांच्या खिशाला ते परवडत नाही. तर दुसरीकडे, चित्रपटगृह मालकांचे म्हणणे असते की, तिकिटांच्या विक्रीतून मिळणारा मोठा हिस्सा हा डिस्ट्रीब्युटर्सना जातो. त्यामुळे थिएटर चालवण्यासाठी आणि कर्मचाऱ्यांचे पगार देण्यासाठी खाद्यपदार्थांची विक्री (F&B) हाच त्यांच्या उत्पन्नाचा मुख्य स्त्रोत असतो.
5 / 6
थोडक्यात सांगायचे तर, सरसकट सर्वच प्रेक्षकांना बाहेरचे अन्न नेण्याची अधिकृत परवानगी नाही. हा निर्णय पूर्णपणे संबंधित चित्रपटगृहाच्या नियमांवर अवलंबून असतो. त्यामुळे, जर तुम्हाला आरोग्याच्या कारणास्तव किंवा लहान मुलांसाठी काही विशेष अन्नपदार्थ सोबत न्यायचे असतील, तर थिएटरमध्ये जाण्यापूर्वी तेथील व्यवस्थापनाशी (Management) संपर्क साधून त्यांना कल्पना देणे कधीही सोयीचे ठरेल.
