Priya Bapat: सीन संपल्यानंतरही तो किस करत राहिला अन्… प्रिया बापटने सांगितला सेटवरचा धक्कादायक अनुभव
Priya Bapat: अभिनेत्री प्रिया बापटने नुकताच दिलेल्या एका मुलाखतीमध्ये हिंदी चित्रपटसृष्टीमध्ये पदार्पण करताना आलेला वाईट अनुभव सांगितला आहे. एक अभिनेता कट म्हटल्यानंतरही प्रियाला किस करत होता. आता नेमकं काय घडलं होतं जाणून घ्या...
मराठी सिनेसृष्टीतील आघाडीची अभिनेत्री प्रिया बापटने आपल्या अभिनयाच्या जोरावर मराठीसह हिंदी मनोरंजन विश्वात स्वत:ची अशी वेगळी ओळख निर्माण केली आहे. तिने वेबसीरिज जगतात स्वतःचे एक वेगळे स्थान निर्माण केले आहे. मात्र, आज यशाच्या शिखरावर असलेल्या प्रियाला एका अत्यंत भयानक आणि धक्कादायक प्रसंगाला सामोरं जावं लागलं होतं. तिच्या पहिल्याच हिंदी चित्रपटाच्या शूटिंग दरम्यान एका सहकलाकाराने तिच्यासोबत गैरवर्तन केले होते. 'फिल्मफेअर'ला दिलेल्या एका मुलाखतीत प्रियाने सई ताम्हणकर, अमृता खानविलकर आणि सोनाली कुलकर्णी यांच्याशी गप्पा मारताना या अंगावर शहारे आणणाऱ्या घटनेचा खुलासा केला.
1 / 6
प्रियाने सांगितले की, मराठी चित्रपटसृष्टीत काम करताना तिला कधीही कोणताही वाईट अनुभव आला नाही. मात्र हिंदीत पदार्पण करताना तिच्यासोबत घडलेल्या या घटनेने तिची मोठी कोंडी झाली होती. या मुलाखतीत तिने त्या अभिनेत्याचे नाव घेणे टाळले, पण बाजूला बसलेली सई ताम्हणकर म्हणाली, "मला बहुधा माहिती आहे तो कोण आहे."
2 / 6
"कथानकानुसार चित्रपटात फक्त एकच किसिंग सीन होता. मला वैयक्तिकरित्या त्याची गरज वाटत नव्हती, म्हणून मी दिग्दर्शकाशीही चर्चा केली होती. पण त्यांचा प्रचंड आग्रह असल्याने मी शेवटी होकार दिला. मात्र, प्रत्यक्ष शूटिंग सुरू झाल्यावर त्या सहअभिनेत्याने मर्यादा ओलांडल्या. सीन संपल्यानंतरही तो मला सातत्याने किस करत राहिला. त्या वेळी मी इतकी गोंधळून गेले आणि घाबरले होते की स्वतःसाठी कशी भूमिका घ्यावी, हेच मला सुचले नाही" असे प्रिया म्हणाली.
3 / 6
या चित्रपटाचे शूटिंग भोपाळमध्ये सुरू होते आणि दोघेही एकाच हॉटेलमध्ये वेगवेगळ्या रूममध्ये राहत होते. तिथंही तो अभिनेता प्रियाला सतत त्रास देत होता. तो तिला वारंवार मेसेज करायचा, रात्रीच्या जेवणासाठी (डिनर) आग्रह करायचा, आपल्या रुमवर येण्यास सांगायचा, इतकंच नाही तर 'तुला स्विमिंग शिकवतो' असे बहाणे शोधायचा.
4 / 6
प्रियाने त्याला प्रत्येक वेळी स्पष्ट शब्दात नकार दिला होता. इतकंच नाही तर एखाद्या सीनमध्ये केवळ मिठी मारण्याचा साधा प्रसंग असला, तरी त्याचा स्पर्श चुकीचा आणि हेतू वाईट आहे हे तिला स्पष्ट जाणवत होते. तो जाणूनबुजून तिच्यासोबतचे सीन वाढवण्याचा प्रयत्न करत होता, असेही प्रियाने सांगितले.
5 / 6
या अत्यंत त्रासदायक आणि भयानक अनुभवामुळे प्रिया प्रचंड मानसिक दडपणाखाली आली होती. ती दररोज रात्री तिचा पती उमेश कामत याला फोन करून ढसाढसा रडायची. खरं तर, या दोघांनी करिअरच्या सुरुवातीपासून एकमेकांच्या सेटवर कधीही न जाण्याचा नियम केला होता. परंतु, फोनवर प्रियाची झालेली मानसिक अवस्था पाहून उमेशला राहवले नाही. त्याने तो नियम बाजूला ठेवला आणि प्रियाला कोणतीही पूर्वकल्पना न देता तो थेट मुंबईहून भोपाळच्या सेटवर पोहोचला. त्यानंतरचे तीन दिवस तो प्रियासोबतच राहिला, ज्यामुळे तिला या कठीण प्रसंगातून बाहेर पडण्याचे बळ मिळाले.
