महाराष्ट्रात सत्तास्थापनेची धावपळ चालू असताना, भाजप नेते सुधीर मुनगंटीवार यांच्या घरी वेगळीच रेलचेल होती. मुंबईत सत्तेचा शुभारंभ होत असताना, मुनगंटीवारांच्या घरी सनई चौघडे वाजत होते.
सुधीर मुनगंटीवार यांची कन्या शलाका मुनगंटीवार विवाहबंधनात अडकली. या लग्नात जे जे वधूपित्याने करायला हवं, ते संपूर्ण कर्तव्य मुनगंटीवारांनी पार पाडलंच, पण मुनगंटीवारांनी स्वत:ही डान्स करुन, लग्नसोहळ्याला चार चांद लावले.
नागपूरच्या एम्प्रेस पॅलेसमध्ये झालेल्या या लग्न सोहळयात संगीत रजनीचं आयोजन करण्यात आलं होतं. सुधीर मुनगंटीवार यांनी पत्नी सपना मुनगंटीवार यांच्यासह वेगवेगळ्या गाण्यांवर ताल धरला.
सर्व कुटुंबासाठी ही गाणी कोरिओग्राफ करण्यात आली होती. संपूर्ण कुटुंब स्टेजवर असताना, सुधीरभाऊ शोस्टॉपर ठरले.
एकीकडे सत्तास्थापनेची धावपळ तर दुसरीकडे लेकीचं लग्न, अशी दुहेरी धावपळीत अडकलेल्या सुधीर मुनगंटीवारांनी दोन्ही भूमिका चोख बजावल्या.
सुधीर मुनगंटीवारांचा डान्स कॅमेरात कैद झाला आणि सोशल मीडियावर वायरल झाला. त्यासोबतच सुधीरभाऊंचं कौतुकही सर्वांकडून केलं जात आहे.
लेकीचं लग्न त्यामुळे कुटुंबप्रमुख या नात्याने पै पाहुण्यांचं जबाबदारीपासून सर्व कौटुंबिक जबाबदारी मुनगंटीवारांवरच होती. या दोन्ही भूमिका मुनगंटीवारांनी पार पाडल्या.