लोहा मतदारसंघ शिवसेनेला सुटला, चिखलीकर समर्थक बंडखोरीच्या तयारीत

नांदेड : शिवसेना-भाजपच्या जागा वाटपात नांदेड जिल्ह्यातील लोहा-कंधार (Loha Kandhar Pratap Patil Chikhalikar) हा मतदारसंघ शिवसेनेला सोडण्यात आलाय. त्यामुळे भाजपचे कार्यकर्ते प्रचंड अस्वस्थ झाले आहेत. भाजपचे खासदार प्रताप पाटील चिखलीकर (Loha Kandhar Pratap Patil Chikhalikar) समर्थकांनी एक मेळावा घेतला. ‘काहीही झालं तरी लोहा कंधार तो है हमारा’चा नारा या मेळाव्यात देण्यात आला. लोहा-कंधारमधून प्रवीण पाटील यांनाच उमेदवारी द्यावी, असा आग्रह कार्यकर्त्यांनी यावेळी केला. दोन दिवसांची वेळ द्या, असं आवाहन खासदार प्रताप पाटील चिखलीकर यांनी केलं आहे.

शिवसेना-भाजप जागा वाटपात लोहा हा मतदारसंघ पूर्वीपासून शिवसेनेच्या कोट्यात आहे. याच लोहामधून गेल्या वेळी स्वतः प्रताप पाटील चिखलीकर हे शिवसेनेच्या उमेदवारीवर आमदार झाले. कालांतराने चिखलीकर भाजपात गेले आणि लोकसभेला निवडून आले. मात्र त्यानंतर लोहा हा मतदारसंघ भाजपला सोडावा असा आग्रह कार्यकर्त्यांचा होता. मात्र शिवसेनेने त्यास नकार देत लोहामधून मुक्तेश्वर धोंडगे यांना उमेदवारी दिली.

चिखलीकर पूर्वी शिवसेनेतून निवडून येऊन भाजपमध्ये गेल्याने शिवसेनेने ही खेळी केली असावी असं बोललं जात आहे. त्यामुळे अस्वस्थ झालेले चिखलीकर समर्थक आज एकत्र आले. लोहा आणि नांदेड दक्षिण हे दोन्ही मतदारसंघ आपल्याचकडे ठेवावेत, अशी मागणी कार्यकर्त्यांनी केली आहे.

मेळाव्यात चिखलीकर समर्थकांची जोरदार भाषणे झाली. कार्यकर्त्यांनी प्रताप पाटील यांना साहेब तुम्ही खासदार बनून राहा, लोहा कंधारकडे येऊ देखील नका, आम्ही आमचं पाहू आणि प्रवीणला आमदार म्हणून निवडून आणू, असं आश्वासन कार्यकर्त्यांनी यावेळी दिलं. लोहा-कंधार मतदारसंघासोबतच कार्यकर्त्यांनी नांदेड दक्षिण मतदारसंघावर दावा केलाय. दक्षिणमधून प्रणिता देवरे यांना उमेदवारी द्यावी, अशी मागणी यावेळी कार्यकर्त्यांनी केली.

दरम्यान, घरासमोर जमलेल्या कार्यकर्त्यांना उद्देशून प्रताप पाटील चिखलीकर यांनी मार्गदर्शन केलं. मी आता मरेपर्यंत भाजपात राहणार आहे, त्यामुळे मला माननीय मुख्यमंत्री देवेंद्र फडणवीस यांच्याशी चर्चा करू द्या, त्यानंतर लोहा-कंधारबाबत निर्णय घेऊ, असं आवाहन चिखलीकर यांनी केलं. गुरुवार सकाळपर्यंत याबाबत अंतिम निर्णय घेऊ. तोवर कार्यकर्त्यांनी शांत राहून संयम पाळावा. शिवसेना जाणीवपूर्वक त्रास देत असेल तर त्याची शिवसेनेला किंमत चुकवावी लागेल, असा इशाराही खासदार चिखलीकर यांनी दिला.