IND vs NZ: न्यूझीलंडचे 198 रन किरकोळ ठरले! अभिषेक शर्मा-वैभव सूर्यवंशीची वादळी जोडी, 3 वर्ल्ड रेकॉर्ड मोठ्या थाटात मोडले
India vs New Zealand News: अभिषेक शर्मा आणि वैभव सूर्यवंशीने ३६ चेंडूंमध्ये ३ विश्वविक्रम मोडत न्यूझीलंडचा धुराळा उडवला आहे. भारताची ऐतिहासिक वादळी सुरुवात झाली आहे.
भारत आणि न्यूझीलंड यांच्यातील तिसरा टी२० सामना वेलिंग्टनमधील हेन्री स्टेडियमवर खेळला जात आहे. नाणेफेक हरल्यानंतर प्रथम फलंदाजी करण्याचा निर्णय घेत किवी संघाने भारतासमोर १९९ धावांचे लक्ष्य ठेवले आहे. जेव्हा वेलिंग्टनमध्ये न्यूझीलंडने १९८ धावा केल्या, तेव्हा असे वाटले होते की भारतीय संघाला हे लक्ष्य गाठायला फारशी अडचण येणार नाही. नंतर मैदानात उतरताच अभिषेक शर्मा आणि वैभव सूर्यवंशी यांनी हे लक्ष्य लहान असल्याचे सिद्ध केले. याबरोबरच त्यांनी ३ विश्वविक्रम मोडले आहेत.
अभिषेक आणि वैभव सूर्यवंशी यांनी शानदार फलंदाजी करत अवघ्या पाच षटकांत १०० धावा केल्या. विशेषतः अभिषेक शर्माने किवी गोलंदाजांची धुलाई करत १५ चेंडूंमध्ये आपले अर्धशतक पूर्ण केले. परदेशातील हे अभिषेक शर्माचे सर्वात जलद अर्धशतक असून टी-२० आंतरराष्ट्रीय सामन्यांमधील त्याचे हे दुसरे सर्वात जलद अर्धशतक आहे. अभिषेक शर्मा आणि वैभव सूर्यवंशी यांनी भारतीय संघाला अशी सुरुवात करून दिली, ज्याची न्यूझीलंडने कदाचित अपेक्षा केली नसेल.
या दोघांनी अवघ्या २.२ षटकांत आपले पहिले अर्धशतक पूर्ण केले. कोणत्याही संघाने केलेली ही सर्वात जलद अर्धशतकी भागीदारी आहे. एवढेच नाही तर अभिषेक शर्मा आणि वैभव सूर्यवंशी यांनी पॉवरप्लेमध्ये सर्वाधिक धावा करण्याचा पराक्रमही केला. भारताने ६ षटकांत ११८ धावा केल्या, जी पॉवरप्लेमधील कोणत्याही संघाची सर्वोच्च धावसंख्या आहे. भारताने ऑस्ट्रेलियाचा जागतिक विक्रम मोडला, ज्यांनी स्कॉटलंडविरुद्ध ११३ धावा केल्या होत्या.
अभिषेक शर्माने १४ चेंडूंमध्ये अर्धशतक झळकावले, तर वैभव सूर्यवंशीला ते जमवता आले नाही. तो १९ चेंडूंमध्ये ४५ धावा करून बाद झाला. वैभवने आपल्या खेळीत चार षटकार आणि चार चौकार मारले. मॅट फिशरच्या गोलंदाजीवर षटकार मारण्याच्या प्रयत्नात तो डॅरिल मिचेलकडे बाद झाला. प्रथम फलंदाजी करताना न्यूझीलंडकडून डॅरिल मिचेलने ५२ चेंडूंमध्ये नाबाद ८९ धावा केल्या, तर बेवन जेकब्सने २३ चेंडूंमध्ये नाबाद ३९ धावा केल्या.
अर्शदीप सिंगने टिम सेफर्टला अवघ्या २ धावांवर बाद केले. त्यानंतर फिन ॲलन आणि डॅरिल मिचेल यांनी दुसऱ्या विकेटसाठी ८६ धावा जोडल्या. ॲलनने या डावात पाच षटकारांसह २५ चेंडूंमध्ये ४० धावा केल्या. मागील दोन सामन्यांमध्ये अर्धशतके झळकावणारा ग्लेन फिलिप्स तिसऱ्या टी२० सामन्यातही उत्कृष्ट लयीत होता. त्याने तीन चौकारांच्या मदतीने १४ चेंडूंमध्ये १७ धावा केल्या. तो अक्षर पटेलच्या गोलंदाजीवर बाद झाला.
