वैभव सूर्यवंशी ताकद पाहून कागिसो रबाडा आश्चर्यचकीत, स्पष्टच म्हणाला की…

आयपीएल 2026 स्पर्धेत राजस्थान रॉयल्सकडून खेळणाऱ्या वैभव सूर्यवंशीने सर्वांचं लक्ष वेधून घेतलं आहे. 15 वर्षांचा असून दिग्गज गोलंदाजांचा त्याने प्रभावीपणे सामना केला आहे. जसप्रीत बुमराहच्या गोलंदाजीवर पहिल्या चेंडूवर षटकार मारणार असं त्याने बोलून दाखवलं होतं. त्याने ते करूनही दाखवलं. जसप्रीत बुमराहच काय तर इतर गोलंदाजांनाही त्याने दिवसा तारे दाखवले आहेत. त्यामुळे त्याची विकेट मिळाल्यावर गोलंदाजांचा जल्लोष काही भलताच असतो. इतकी दहशत त्याची गोलंदाजांच्या मनात आहे. असं असताना त्याच्या आक्रमक फलंदाजीचं कागिसो रबाडाने कौतुक केलं आहे. वैभव सूर्यवंशीने कागिसो रबाडाच्या षटकात दोन उत्तुंग षटकार मारले होते. त्यानंतर कागिसो रबाडा त्याच्या फलंदाजीच्या प्रेमात पडला आहे. त्याची बॅट स्विंग पाहून खूश झाल्याचं रबाडाने सांगितलं. इतकंच काय तर वैभवच्या मनात कुठेच भीती दिसत नाही, असंही त्याने सांगितलं.

कागिसो रबाडाने सांगितलं की, ‘वैभव सूर्यवंशीमध्ये जबरदस्त टॅलेंट आहे. त्याचा हात वेगाने चालतो. त्याच्या मनात कुठेच भीती दिसत नाही. जेव्ही तुम्ही तरूण असता तेव्हा असं असतं.’ वैभव सूर्यवंशीचं कौतुक करताना रबाडाने पुढे सांगितलं की, ‘सूर्यवंशीला असं करताना पाहून आश्चर्य वाटतं. मला वाटतं की, क्रिकेटच्या खेळात खासकरून आयपीएलमध्ये असं पाहणं चांगली गोष्ट आहे. त्याला पाहून खूप चांगलं वाटतं की क्रिकेट हा खेळ हा रोमांचक आहे.’ वैभव सूर्यवंशीने 11 डावात 440 धावा केल्या आहेत. त्याने 40 च्या सरासरीने आणि 236 च्या स्ट्राईक रेटने या धावा केल्या आहेत.

गुजरात टायटन्स आणि राजस्थान रॉयल्स यांच्यात 9 मे रोजी सामना झाला होता. या सामन्यात वैभव सूर्यवंशीचा सामना कागिसो रबाडाशी झाला होता. तेव्हा वैभवने दुसऱ्या आणि तिसऱ्या चेंडूवर षटकार मारले होते. वैभव सूर्यवंशीने 3 षटकार आणि 3 चौकारांच्या मदतीने 13 चेंडूत 36 केल्या होत्या. पण त्याची खेळी कामी आली नाही. गुजरात टायटन्सने विजयासाठी 230 धावांचं आव्हान दिलं होतं. पण राजस्थानचा संघ फक्त 152 धावा करू शकला आणि सर्वबाद झाला.