ENG vs SL : जो रूटने शतक ठोकताच विराट कोहलीला ट्रोल करण्याचा प्रयत्न, पण…

इंग्लंड आणि श्रीलंका यांच्यात दुसरा कसोटी सामना सुरु आहे. या सामन्यात इंग्लंडचं पारडं दुसऱ्या दिवशीच जड झालं आहे. कारण श्रीलंकेवर फॉलोऑनची नामुष्की ओढावू शकते. इंग्लंडने पहिल्या डावात 10 गडी गमवून 427 धावा केल्या. तर पहिल्या डावात श्रीलंकेचा निम्म्याहून अधिक संघ 150 धावांच्या आताच तंबूत परतला आहे. असं सर्व इंग्लंडच्या बाजूने चित्र असताना जो रूट आणि विराट कोहली यांची चर्चा रंगली आहे. खरं तर हा विषय इंग्लंडचा माजी क्रिकेटपटू मायकल वॉनने समोर आणत डिवचलं आहे. त्याने जो रुटच्या शतकाचा संदर्भ देत विराट कोहलीला ट्रोल करण्याचा प्रयत्न केला. मायकल वॉनने जो रूट आणि विराट कोहली यांची तुलना करणारी आकडेवारी पोस्ट केली आहे. जो रूट विराट कोहलीच्या पुढे असल्याचं या पोस्टच्या माध्यमातून त्याने दाखवलं आहे. जो रूटने कसोटीत 33, तर विराट कोहलीने 29 शतकं झळकावली आहेत.

मायकल वॉन विराट कोहलीला ट्रोल करताना एक गोष्ट विसरला की, विराट कोहली जो रूटपेक्षा 72 डाव कमी खेळला आहे. दुसरीकडे विदेशात कसोटी शतकांबाबत बोलायचं तर रुटने SENAI देशात फक्त 6 शतकं झळकावली आहेत. विराट कोहलीचा हा आकडा 11 आहे. विराट कोहलीने मागच्या 4 वर्षात फक्त 2 शतकं झळकावली आहेत. तर जो रूटने 16 शतकं ठोकली आहेत. दरम्यान विराट कोहली पुढच्या वर्षात बरंच कसोटी क्रिकेट खेळणार आहे. बांगलादेशविरुद्धच्या सामन्यात त्याला शतकी खेळी करण्याची संधी आहे. जर या दोन सामन्यात विराट कोहलीने शतकी खेळी केली तर जो रूटशी स्पर्धा तीव्र होईल.

Morning India 🇮🇳 pic.twitter.com/Ax5g75yLyS

— Michael Vaughan (@MichaelVaughan) August 30, 2024

पुढच्या महिन्यात भारत आणि बांगलादेश यांच्यात दोन सामन्यांची कसोटी मालिका होणार आहे. या मालिकेवर लक्ष लागून असणार आहे. कारण टेस्ट चॅम्पियनशिप अंतिम फेरीसाठी ही मालिका खूप महत्त्वाची आहे. दुसरीकडे, पाकिस्तानला पराभूत केल्याने बांगलादेशचा आत्मविश्वास दुणावलेला आहे. त्यामुळे बांगलादेशला हलक्यात घेणं महागडा पडू शकतं. भारत आणि बांगलादेश यांच्यात पहिला कसोटी सामना 19 सप्टेंबरपासून होणार आहे.