पाचव्या कसोटी सामन्यातून रजत पाटिदारचा पत्ता कट! बीसीसीआयने आखली अशी रणनिती

मुंबई : भारत इंग्लंड यांच्यात पाचवा कसोटी सामना 7 मार्च रोजी धर्मशाळा येथे आहे. हा सामना जिंकून भारतीय संघ शेवट गोड करण्याचा प्रयत्नात आहे. पाचवा सामना जिंकला तर गुणतालिकेत अव्वल स्थान गाठणं सोपं होणार आहे. त्यामुळे मालिका जिंकली तरी हा सामना खूपच महत्त्वाचा आहे. त्या दृष्टीने कर्णधार रोहित शर्मा आणि मुख्य प्रशिक्षक राहुल द्रविड संघात काही महत्त्वाचे बदल करण्याची शक्यता आहे. निवडकर्ते 2 मार्चपर्यंत प्लेइंग इलेव्हनबाबत अंतिम निर्णय घेण्याची शक्यता आहे. केएल राहुल संघात परतणार की, रजत पाटिदारला संघात स्थान मिळणार यावर खलबतं सुरु झाली आहेत. तीन कसोटी सामन्यांसाठी संघ जाहीर करताना स्पष्ट केलं होतं की, “केएल राहुल फिट होईपर्यंत रजत पाटिदारला संघात स्थान दिले.” पण सध्या रजत पाटिदारला सूर गवसताना दिसत नाही. दुसरीकडे, केएल राहुल फिट की अनफिट यावरही प्रश्नचिन्ह आहे.

मीडिया रिपोर्ट्सनुसार, केएल राहुलला उजव्या क्वाड्रिसेप्समध्ये सतत दुखापत जाणवत असल्याने तज्ज्ञांचा सल्ला घेण्यासाठी लंडनला गेला आहे. दुखापतीमुळे तो इंग्लंडविरुद्धच्या मागच्या तीन कसोटी सामन्यांपासून दूर राहिला होता. टाईम्स इंडियाच्या वृत्तानुसार, निवडकर्त्यांना पाटिदारला संघातून वगळायचं आहे. जेणेकरून तो रणजी स्पर्धेच्या उपांत्य फेरीत मध्य प्रदेशकडून मैदानात उतरेल. हा सामना 2 मार्चला होणार आहे. त्यामुळे केएल राहुल फीट झाला तर रजत पाटिदारला डच्चू मिळेल.

दुसरीकडे, रजत पाटिदारच्या जागी देवदत्त पडिक्कल यालाही संधी मिळण्याची शक्यता आहे. कारण रजने मागच्या सहा डावात हवी तशी कामगिरी केलेली नाही. मागच्या सहा डावात रजत पाटिदाराची 32 ही सर्वोत्तम खेळी आहे. पाटिदार दोन वेळा शून्यावर बाद झाला आहे. त्यामुळे पाचव्या कसोटीत त्याला या ना त्या कारणाने वगळण्याची शक्यता आहे. शेवटचा कसोटी सामना झाला की आयपीएलची रणधुमाळी असेल. त्यानंतर लगेचच टी20 वर्ल्डकप असणार आहे. त्यामुळे कसोटीसाठी ऑगस्ट सप्टेंबर महिन्याची वाट पाहावी लागणार आहे.