Shubman Gill: मालिका जिंकल्यानंतरही गिलच्या मनात एक खंत कायम, सामन्यानंतर ‘ती’ एक भीती बोलून दाखवली

IND vs SL: कोलंबो येथे दुसरी कसोटी अनिर्णित राहिल्यानंतर, भारतीय क्रिकेट संघाने श्रीलंकेविरुद्धच्या दोन सामन्यांच्या कसोटी मालिकेत १-० असा विजय मिळवला. पहिल्या डावात ५०३ धावांचा डोंगर उभा करून श्रीलंकेला फॉलो-ऑन देण्यास भाग पाडले असले तरी, यजमान संघाच्या फलंदाजांच्या झुंजार कामगिरीमुळे भारताला विजय मिळवता आला नाही. या रोमांचक अनिर्णित सामन्यानंतर आणि मालिका विजयानंतर, भारतीय कर्णधार शुभमन गिलने प्रतिस्पर्धी संघाच्या जिद्दीचे कौतुक केले आणि आपल्या युवा संघाच्या कामगिरीबद्दल आनंद व्यक्त केला.

सामन्यानंतर शुभमन गिल काय म्हणाला?

सामन्यानंतर, हा निकाल मिळवण्यासाठी भारतीय संघ काही वेगळे करू शकला असता का, असे विचारले असता गिल म्हणाला, “प्रामाणिकपणे सांगायचे तर, काहीही नाही. आम्ही सलग तीन दिवस जवळपास २५० षटके क्षेत्ररक्षण केले आणि आमच्याकडून जे शक्य होते ते सर्व केले. श्रीलंकेने उत्कृष्ट खेळ केला. त्यांचे फलंदाज खूप चांगले खेळले. त्यांच्याकडे प्रतिभा होती आणि थोडे नशीबही होते. त्यामुळे, मला नाही वाटत की आम्ही काही वेगळे करू शकलो असतो.”

१-० ने मालिका जिंकल्यानंतर, कर्णधार गिलने संघाच्या एकूण कामगिरीचे मूल्यांकन करताना, प्रतिस्पर्धी संघाकडून शिकण्याबद्दल सांगितले. तो म्हणाला, “या मालिकेतून, अगदी प्रतिस्पर्धी संघाकडूनही, आमच्यासाठी अनेक सकारात्मक गोष्टी मिळाल्या. त्यांच्यावर असलेला दबाव आणि ज्या प्रकारे त्यांनी पुनरागमन केले ते पाहणे आश्चर्यकारक होते. जेवणाच्या आणि चहापानाच्या वेळीही, आम्ही यावर बोलत होतो की आम्ही यापेक्षा वेगळे काहीही करू शकलो नसतो. पडिक्कल संपूर्ण मालिकेत उत्कृष्ट खेळला, केएल राहुल अप्रतिम होता, मानव सुथारने अपवादात्मक गोलंदाजी केली आणि प्रसिद्ध कृष्णाने दोन्ही डावांमध्ये कठोर परिश्रम घेतले. आमच्या गोलंदाजांनी आपले सर्वस्व दिले.” त्यामुळे संपूर्ण सामन्यात श्रीलंकेचा खेळ पाहून गिलच्या मनात भीती निर्माण झाली हे स्पष्टपणे कळते.

शुभमन गिल म्हणाला, “हा आमच्यासाठी खूप रोमांचक काळ आहे. मैदानावर आणि मैदानाबाहेर, आमच्या तयारीमध्ये आणि कामगिरीमध्ये सातत्य राखणे महत्त्वाचे आहे. आतापर्यंतच्या या प्रवासात आमच्यासाठी अनेक सकारात्मक गोष्टी घडल्या आहेत.”