भारतात Vivo X300 Ultra आणि Vivo X300 FE ची विक्री मोठ्या सवलतींसह सुरू

विवोने भारतीय बाजारपेठेत त्यांचे नवीन फ्लॅगशिप स्मार्टफोन्स, Vivo X300 Ultra आणिVivo X300 FE यांची विक्री सुरू केली आहे. दोन्ही फोन्समध्ये उत्तम कॅमेरा सेटअप, प्रीमियम डिझाइन आणि नवीनतम प्रोसेसर आहेत. विशेष म्हणजे Vivo X300 Ultra मध्ये ट्रिपल झाईस मास्टर प्राइम लेन्स आहे, जी फोटोग्राफीच्या शौकिनांना आकर्षित करू शकते. तर दुसरीकडे, Vivo X300 FE फ्लॅगशिप परफॉर्मन्स उत्तम देतो. चला तर मग या फोनची ऑफर किंमत किती आहे आणि त्यांच्या उपलब्धतेबद्दल जाणून घेऊयात.

ही किंमत आहे

Vivo X300 Ultra हा कंपनीचा सर्वात प्रीमियम स्मार्टफोन म्हणून सादर करण्यात आला आहे. भारतात 16जीबी रॅम आणि 512जीबी स्टोरेज असलेल्या व्हेरिएंटची किंमत 1 लाख 59 हजार 999 रूपये आहे. हा फोन एक्लिप्स ब्लॅक आणि व्हिक्टरी ग्रीन या रंगांच्या पर्यायांमध्ये उपलब्ध आहे.

तर Vivo X300 FE चा 12जीबी रॅम आणि 256जीबी स्टोरेज असलेल्या सुरूवाती व्हेरिएंटसाठी 79 हजार 999 रूपयांपासून सुरू होते. 512 जीबी स्टोरेज असलेल्या टॉप-ऑफ-द-लाइन व्हेरिएंटची किंमत 89 हजार 999 रूपये आहे.

कंपनीने विवो झाईस टेलीफोटो एक्सटेंडर जेन 2 अल्ट्रा आणि इमेजिंग ग्रिप किट यांसारख्या ॲक्सेसरीज देखील लाँच केल्या आहेत, ज्यांची किंमत अनुक्रमे 27 हजार 999 रूपये आणि 11 हजार 999 रूपये आहे.

बँकेच्या ऑफर्स आणि एक्सचेंजचे फायदे

विवोने दोन्ही स्मार्टफोन्ससोबत अनेक लाँच ऑफर्सही सादर केल्या आहेत. ग्राहक एसबीआय, कोटक, अमेरिकन एक्सप्रेस, डीबीएस, आयडीएफसी फर्स्ट आणि ॲक्सिस बँक कार्ड्स वापरून 10 टक्के इन्स्टंट कॅशबॅक मिळवू शकतात. यूपीआय व्यवहारांवरही सवलत उपलब्ध आहे.

कंपनी 60 टक्क्यांपर्यंत ॲश्युअर्ड बायबॅक, एक वर्षाची विस्तारित वॉरंटी आणि 1,599 च्या व्ही-शील्ड स्क्रीन प्रोटेक्शन प्लॅनवर 60 टक्क्यांपर्यंत सूट देत आहे. विवोने एक्स३०० अल्ट्रा फोटोग्राफर किट देखील सादर केले आहे, ज्यामध्ये टेलीफोटो एक्सटेंडर आणि इमेजिंग ग्रिप यांसारख्या ॲक्सेसरीजचा समावेश आहे. हे किट 2 लाख 09 हजार 999रूपयांमध्ये उपलब्ध असून, कंपनी त्यावर 4 हजार रूपयांची सूट देत आहे.

दोन्ही फोन्स ॲमेझॉन, फ्लिपकार्ट, क्रोमा, रिलायन्स डिजिटल, विजय सेल्स आणि ऑफलाइन स्टोअर्सवर विक्रीसाठी उपलब्ध आहेत.

Vivo X300 Ultra ची वैशिष्ट्ये

Vivo X300 Ultra मध्ये 144Hz रिफ्रेश रेटला सपोर्ट करणारा 6.82-इंचाचा 2के एलटीपीओ अमोलेड डिस्प्ले आहे. हा फोन स्नॅपड्रॅगन 8 एलिट जेन 5 प्रोसेसरवर चालतो, जो फ्लॅगशिप-स्तरीय कामगिरी देतो. यात 200MP पेरिस्कोप टेलीफोटो कॅमेऱ्यासह ट्रिपल रियर कॅमेरा सेटअप आहे. या स्मार्टफोनमध्ये 6600mAh बॅटरी असून तो 100W फास्ट चार्जिंगला सपोर्ट करतो. हा अँड्रॉइड 16-आधारित ओरिजिनओएस 6 वर चालतो आणि त्याला आयपी68 व आयपी69 रेटिंग आहे.

Vivo X300 FE ची वैशिष्ट्ये

Vivo X300 FE मध्ये 120Hz रिफ्रेश रेटला सपोर्ट करणारा 6.31-इंचाचा FHD+ AMOLED डिस्प्ले आहे. हा फोन स्नॅपड्रॅगन 8 Gen 5 चिपसेटवर चालतो आणि यात 12GB रॅम आहे. कॅमेऱ्याच्या बाबतीत बोलायचे झाल्यास यात 50MP प्रायमरी कॅमेरा, 50MP टेलीफोटो कॅमेरा आणि 8MP अल्ट्रावाइड कॅमेरा आहे. सेल्फी आणि व्हिडिओ कॉलिंगसाठी 50MP चा फ्रंट कॅमेरा दिला आहे.

या फोनमध्ये 6500mAh बॅटरी असून ती 90W फास्ट चार्जिंग आणि 40W वायरलेस चार्जिंगला सपोर्ट करते. हा स्मार्टफोन अँड्रॉइड 16-आधारित OriginOS 6 वर चालतो आणि त्याला IP68-IP69 रेटिंग आहे.