VIDEO: पोलिसांच्या ताफ्यात लवकरच उडणारी बाईक

दुबई (यूएई) : जगात सध्या टेक्नॉलॉजी इतकी वाढली आहे की तंत्रज्ञानाने आपण घेरले आहोत. नुकतेच चीनने बातम्या देणाऱ्या रोबोट अँकरची निर्मिती केली आहे. चीनने रोबोट अँकरची निर्मिती केली असताना, तिकडे दुबईत वेगळंच तंत्रज्ञान समोर आलं आहे. चोरांना पकडण्यासाठी पोलिसांना अद्ययावत तंत्र उपलब्ध झालं आहे.

दुबई पोलिसांच्या ताफ्यात लवकरच चक्क उडणारी बाईक येणार आहे. चोर कितही सुसाट असला तरी तो या उडणाऱ्या बाईकच्या पुढे जाऊ शकणार नाही. ही बाईक 16 फूट उंचीवरुन हवेत उडू शकते. तिचा वेग ताशी 70 किमी इतका आहे. एकदा उडवली तर सलग 40 किमीपर्यंत ती जाऊ शकते. इतकंच नाही तर यामध्ये 3 बॅटरी आहेत, त्या चार्ज करण्यासाठी 3 तास लागतात. या बाईकचं वजन 104 किलो असून ती 115 किलोपर्यंतचं वजन वाहू शकते.

सध्या दुबई पोलिसांना या उडत्या बाईकचं ट्रेनिंग देण्यात येत आहे.  या बाईकची निर्मिती अमेरिकन कंपनीने केली आहे.  स्कॉर्पियन 3 होवर बाईक असं या बाईकला नाव देण्यात आलं आहे. ड्रोनप्रमाणे दिसणारी बाईक 70 किमी वेगाने सुसाट जाऊ शकते. या बाईकची किंमत 39 लाख रुपये आहे.

दुबईमध्ये 2020 पासून या बाईकचा वापर सुरु होणार आहे. सध्या 4 बाईकद्वारे पोलिसांना ट्रेनिंग देण्यात येत आहे. येत्या काळात या बाईक्सची संख्या वाढवण्यात येणार आहे.

दुबईच्या पोलीस अधिकाऱ्याने सांगितले की, “शहराच्या सुरक्षिततेसाठी ‘होवर बाईक’चा वापर पोलीस करणार आहेत. आमचे चार कर्मचारी त्या बाईकचे प्रशिक्षण घेत आहे. 2020 पर्यंत या बाईकचा उपयोग आम्ही करु. ज्या ठिकाणी पोहोचता येत नाही अशा ठिकाणी, ट्रॅफिकमध्ये आणि आपात्कालिन परिस्थितीत या बाईकचा वापर होणार आहे. ही बाईक अत्याधुनिक तंत्रज्ञानातून बनवली आहे”.

बाईकची वैशिष्ट्ये

वेग ताशी 70 किमी

16 फूट उंचीवरुन हवेत उडू शकते

एकदा उडवल्यानंतर सलग 40 किमीपर्यंत जाऊ शकते

बाईकचं वजन 104 किलो

115 किलोपर्यंतचं वजन वाहू शकते

किंमत 39 लाख रुपये

.@DubaiPoliceHQ starts training on flying Hoverbike. #Dubai https://t.co/qyRQXozfRM #Dubai

— Dubai Media Office (@DXBMediaOffice) November 8, 2018

https://www.youtube.com/watch?v=h51Gyw-Uirs