आधार कार्डवरील मोबाईल नंबर बदलायचा? जाणून घ्या स्टेप-बाय-स्टेप प्रोसेस!

आजच्या धावपळीच्या जीवनात आधार कार्ड एक महत्त्वाचं ओळखपत्र बनलं आहे. अनेक सरकारी आणि खासगी कामांसाठी याची गरज भासते. आधार कार्डाच्या ऑनलाइन सुविधांचा लाभ घेण्यासाठी तुमचा मोबाईल नंबर UIDAI सोबत जोडलेला असणं अत्यंत आवश्यक आहे. कारण कोणत्याही ऑनलाइन बदलांसाठी तुमच्या मोबाईल नंबरवर OTP (वन टाइम पासवर्ड) येतो आणि या OTP द्वारेच तुमची ओळख निश्चित केली जाते. त्यामुळे आधारशी लिंक केलेला मोबाईल नंबर नेहमी सुरु ठेवा, जेणेकरून तुम्हाला ऑनलाइन सेवा वापरताना कोणत्याही अडचणींचा सामना करावा लागणार नाही.

अनेक नागरिकांच्या मनात प्रश्न असतो की आधार कार्डमधील मोबाईल नंबर ऑनलाइन पद्धतीने बदलता येतो का? तर या प्रश्नाचं स्पष्ट उत्तर आहे, नाही. आधार कार्डमधील मोबाईल नंबर तुम्ही ऑनलाइन अपडेट करू शकत नाही.

मोबाईल नंबर ऑनलाईन अपडेट का होत नाही?

जर तुम्ही नवीन मोबाईल नंबर घेतला असेल आणि तो आधार कार्डशी जोडण्याची किंवा बदलण्याची गरज असेल, तर हे काम ऑनलाइन पद्धतीने शक्य नाही. यासाठी तुम्हाला ऑफलाइन प्रक्रियेचा अवलंब करावा लागेल. सुरक्षेच्या कारणास्तव, UIDAI ने मोबाईल नंबर अपडेट करण्याची ऑनलाइन सुविधा उपलब्ध केलेली नाही. यामुळे तुमच्या आधार डेटाची सुरक्षा अधिक सुनिश्चित केली जाते.

मोबाईल नंबर अपडेट कसा कराल?

आधार कार्डमधील मोबाइल नंबर बदलण्याची प्रक्रिया सोपी आहे. पण ती फक्त ऑफलाईनच करता येते. चला, ही प्रक्रिया पायऱ्यांमध्ये समजून घेऊ.

1. तुमच्या घराजवळच्या आधार नोंदणी केंद्रावर जा.
2. आधारमध्ये बदल करण्यासाठी करेक्शन फॉर्म भरा.
3. हा फॉर्म आधार एक्झिक्युटिव्हकडे जमा करा.
4. बायोमेट्रिक माहिती देऊन तुमच्या तपशीलांची पडताळणी करा.
5. यासाठी 50 रुपये शुल्क भरावं लागेल.
6. तुम्हाला एक पावती मिळेल. यामध्ये अपडेट रिक्वेस्ट नंबर (URN) असेल. या नंबरद्वारे तुम्ही तुमच्या अर्जाची सद्यस्थिती तपासू शकता.
7. काही दिवसांत तुमचा मोबाइल नंबर आधारशी जोडला जाईल.

त्यामुळे, जर तुम्हाला तुमच्या आधार कार्डमधील मोबाईल नंबरमध्ये बदल करायचा असेल, तर आता तुम्हाला ऑनलाइन पर्याय उपलब्ध नसल्याचं स्पष्ट झालं आहे. तुम्ही सहजपणे तुमच्या जवळच्या आधार नोंदणी केंद्राला भेट देऊन ही ऑफलाइन प्रक्रिया पूर्ण करू शकता.