दुष्काळाची झळ, CM फडणवीसांचा दौरा; धाराशिव-सोलापुरात पाहणीची शक्यता

मुख्यमंत्री देवेंद्र फडणवीस लवकरच मराठवाड्यातील दुष्काळी भागांचा दौरा करण्याची शक्यता आहे. सूत्रांकडून मिळालेल्या माहितीनुसार, मुख्यमंत्री उद्यापासून मराठवाड्याच्या काही भागांना भेटी देणार आहेत. या दौऱ्यात ते थेट शेतकऱ्यांच्या बांधावर जाऊन दुष्काळी परिस्थितीचा आणि त्यांच्या समस्यांचा आढावा घेणार आहेत. सध्या मराठवाडा तसेच पश्चिम महाराष्ट्रातील काही भागांमध्ये तीव्र दुष्काळी स्थिती निर्माण झाली आहे. या गंभीर परिस्थितीची दखल घेत मुख्यमंत्री कार्यालयाकडून दुष्काळग्रस्त भागांची सविस्तर माहिती मागवण्यात आली आहे.

कोणत्या विशिष्ट भागांना भेट द्यायची, हे अद्याप निश्चित झालेले नसले तरी, धाराशिव आणि सोलापूर जिल्ह्यांच्या काही भागांमध्ये पाहणी दौरा होण्याची शक्यता वर्तवली जात आहे.  माहितीनुसार, मुख्यमंत्री कार्यालयाकडून संपूर्ण परिस्थितीचा आढावा घेतला जात असून, दौऱ्याचा नेमका कार्यक्रम लवकरच स्पष्ट होईल. या दौऱ्यामुळे शेतकऱ्यांना काही प्रमाणात दिलासा मिळण्याची अपेक्षा आहे.