Lalbaugcha Raja : बाप्पाला निरोप देण्यासाठी कोळी बांधवांचा जल्लोष! पारंपरिक वेशभूषा, ढोल-ताशांचा गजर अन् मोरयाच्या जयघोषात लालबागचा राजा मार्गस्थ

लालबागचा राजा आपल्या भव्य विसर्जन मिरवणुकीसाठी सज्ज झाला आहे. लाखो भक्तांचे श्रद्धास्थान असलेल्या या राजाची मिरवणूक लवकरच मार्गस्थ होणार असून, या क्षणासाठी मुंबईकर मोठ्या आतुरतेने वाट पाहत आहेत.

गणपती बाप्पा आता विसर्जन मिरवणुकीसाठी पूर्णपणे तयार असून, मिरवणुकीला सुरुवात झाली आहे. या आनंदोत्सवात कोळी बांधवांचा उत्साह विशेष लक्षवेधी ठरत आहे. पारंपरिक वेशभूषेत, ढोल-ताशांच्या गजरात आणि गणपती बाप्पा मोरिया, पुढच्या वर्षी लवकर या च्या जयघोषात कोळी बांधव मिरवणुकीला एक वेगळीच शोभा आणतात. त्यांच्या जोडीला, चिमुकले भक्तही मोठ्या उत्साहात या मिरवणुकीत सहभागी झाले आहेत, बाप्पाला निरोप देण्यासाठी ते उत्सुक दिसत आहेत.

लालबागचा राजाची विसर्जन मिरवणूक मुंबईतील एक ऐतिहासिक आणि सांस्कृतिक सोहळा मानली जाते. ही मिरवणूक पाहण्यासाठी मुंबईसह देशभरातून भाविक मोठ्या संख्येने उपस्थित राहतात. शांतता आणि उत्साहाच्या वातावरणात बाप्पाला निरोप दिला जात असून, ही मिरवणूक मुंबईच्या गणेशोत्सवाची खरी शान आहे.