लक्ष्मण हाकेंचे आंदोलन स्थगित; मुंबईत बावनकुळेंशी चर्चा करणार

लक्ष्मण हाके यांच्या नेतृत्वाखालील ओबीसी एल्गार मोर्चा आता तात्पुरता स्थगित करण्यात आला आहे. मंत्री चंद्रशेखर बावनकुळे यांनी लक्ष्मण हाके यांना फोन करून मुंबईमध्ये चर्चेसाठी बोलावल्यानंतर हा महत्वपूर्ण निर्णय घेण्यात आला. कालपासून मुंबईकडे निघालेला हा मोर्चा, ओबीसी समाजाच्या विविध मागण्यांसाठी आयोजित करण्यात आला होता. बावनकुळे यांनी लक्ष्मण हाके यांना मुख्यमंत्र्यांसोबत बैठक आयोजित करण्याचे आश्वासन दिल्याची माहिती आहे.

या आवाहनानंतर हाके यांनी मोर्चा थांबवण्याचा निर्णय घेतला. हा मोर्चा तात्पुरता थांबवला असला तरी, ओबीसी समाजाच्या मागण्या मान्य होईपर्यंत लढा सुरूच राहणार असल्याचे ओबीसी कार्यकर्त्यांनी स्पष्ट केले आहे. हा लढा केवळ एका व्यक्तीच्या समाधानावर अवलंबून नसून, संपूर्ण ओबीसी समाजाच्या न्याय हक्कासाठी असल्याचे त्यांचे म्हणणे आहे. त्यामुळे, आगामी काळात मुंबईत होणाऱ्या चर्चेतून काय निष्पन्न होते, याकडे सर्वांचे लक्ष लागले आहे.