Ambadas Danve : ऑक्टोबरची वाट का पाहता? दुष्काळावर अंबादास दानवेंचा सरकारला थेट सवाल; पुढे म्हणाले…

महाराष्ट्रातील मराठवाडा आणि विदर्भात दुष्काळसदृश परिस्थिती निर्माण झाली असून, यावर विधान परिषदेचे विरोधी पक्षनेते अंबादास दानवे यांनी सरकारवर सडकून टीका केली आहे. कर्नाटक राज्याने १३० तालुक्यांमध्ये दुष्काळ जाहीर करून तीन आठवडे उलटले असताना, महाराष्ट्र सरकार मात्र ५ ऑक्टोबरच्या घोषणेची वाट पाहत असल्याचे दानवे यांनी म्हटले आहे.

गेले ५२-५३ दिवस पावसाने खंड दिल्याने पिकांचे मोठे नुकसान झाले आहे. कोरडवाहू शेती पूर्णपणे उद्ध्वस्त झाली असून, बागायती पिकांनाही विजेअभावी फटका बसला आहे. अशा परिस्थितीत दुष्काळ जाहीर करण्यासाठी ५ ऑक्टोबरची वाट पाहण्याची काय गरज आहे, असा सवाल दानवे यांनी उपस्थित केला. सरकार या प्रश्नापासून पळ काढण्याचा प्रयत्न करत असल्याचा आरोप त्यांनी केला.

दुष्काळ जाहीर करण्यात होत असलेल्या विलंबामुळे शेतकरी मोठ्या आर्थिक संकटात सापडला आहे. पंचनामे तातडीने सुरू करण्याची मागणी करण्यात येत आहे. विरोधी पक्ष म्हणून आम्ही मराठवाड्यात दौरा करून शेतकऱ्यांच्या भेटी घेतल्या आहेत आणि सरकारच्या या निष्क्रियतेविरोधात आवाज उठवत असल्याचे दानवे यांनी सांगितले.