Tuljapur : ड्रग्स तस्करीचे आरोपी भाजपवासी; विरोधकांनी घेरलं अन् सुळेंचं थेट फडणवीसांना पत्र

तुळजापूर येथील ड्रग्स तस्करी प्रकरणात आरोप असलेल्या संतोष परमेश्वर कदम आणि चंद्रकांत कणे यांनी भारतीय जनता पक्षात प्रवेश केल्याने महाराष्ट्राच्या राजकारणात नवा वाद निर्माण झाला आहे. विरोधी पक्षांनी यावरून भाजपवर जोरदार टीका केली आहे, भाजपने गुन्हेगार प्रवृत्तीच्या लोकांना पक्षात घेऊन त्यांना पाठीशी घालण्याचा प्रयत्न केल्याचा आरोप केला जात आहे. हा प्रवेश भाजपच्या पक्ष कार्यालयात वरिष्ठ नेत्यांच्या उपस्थितीत झाल्याने विरोधकांनी भाजपच्या भूमिकेवर प्रश्नचिन्ह उपस्थित केले आहे.

राष्ट्रवादी काँग्रेसच्या नेत्या सुप्रिया सुळे यांनी या संदर्भात मुख्यमंत्री तथा गृहमंत्री देवेंद्र फडणवीस यांना पत्र लिहून या गंभीर प्रकरणाकडे लक्ष वेधले असून, दोषींवर योग्य ती कारवाई करण्याची मागणी केली आहे. भाजपने मात्र या आरोपांना उत्तर देताना, आपण कोणत्याही आरोपीचे समर्थन करत नसल्याचे स्पष्ट केले आहे.

या प्रकरणात कोणी दोषी आढळल्यास निश्चितपणे कारवाई केली जाईल आणि त्यांना पाठीशी घातले जाणार नाही, असे भाजपने म्हटले आहे. तसेच, भाजपने हेही नमूद केले की ज्या कार्यकर्त्यावर सध्या आरोप होत आहेत, तो पूर्वी राष्ट्रवादी काँग्रेस पक्षातच कार्यरत होता.