Mumbai Rain Updates | मुंबईकरांना उकाड्यापासून दिलासा, पण गणेशभक्तांची चिंता वाढली! गणेशोत्सवाच्या तोंडावर मुसळधार पावसाची हजेरी

मुंबई शहरात दीड महिन्यांच्या मोठ्या विश्रांतीनंतर पावसाने पुन्हा जोरदार हजेरी लावली आहे. काल रात्रीपासूनच मुंबईत पावसाला सुरुवात झाली असून, आज सकाळी ६ वाजल्यापासून शहर आणि उपनगरांमध्ये मुसळधार पाऊस सुरू आहे. विशेषतः मलबार हिल, दादरसह अनेक परिसरात पावसाची संततधार पाहायला मिळत आहे.

या पावसामुळे ऐन पावसाळ्यात जाणवणाऱ्या उकाड्यापासून मुंबईकरांना दिलासा मिळाला आहे. मात्र, उद्यापासून सुरू होणाऱ्या गणेशोत्सवाच्या तोंडावर या पावसामुळे गणेश भक्तांची गैरसोय होण्याची शक्यता आहे. गणेश मूर्ती खरेदी, सजावटीचे साहित्य आणि इतर तयारीसाठी बाहेर पडणाऱ्या नागरिकांना पावसाचा अडथळा निर्माण होत आहे. हवामान विभागाने आज आणि उद्याही अशाच पद्धतीने मुसळधार पाऊस सुरू राहण्याचा अंदाज वर्तवला आहे. यामुळे सणासुदीच्या काळात मुंबईकरांना काही प्रमाणात अडचणींचा सामना करावा लागू शकतो. टीव्ही ९ मराठीचे प्रतिनिधी निवृत्ती बाबर यांनी याबाबत अधिक माहिती दिली.