Mumbaicha Raja Visarjan : मुंबईच्या राजाची भव्य विसर्जन मिरवणूक; तरुणांचा मोठा समावेश, व्हिडिओ व्हायरल

गणेशोत्सवाच्या सांगतेनिमित्त मुंबईच्या राजाची (गणेश गल्लीचा राजा) भव्य विसर्जन मिरवणूक मोठ्या उत्साहात पार पडली. गणपती बाप्पा मोरया, पुढच्या वर्षी लवकर या च्या जयघोषाने मुंबई नगरी दुमदुमून गेली होती. यंदा गणेश गल्ली मंडळाचे हे ९९वे वर्ष असून, २२ फुटी मुंबईच्या राजाच्या मूर्तीचे विसर्जन एका वेगळ्या पद्धतीने करण्यात आले.

या मूर्तीचे वैशिष्ट्य म्हणजे ती २२ फूट उंच असून, भरतनाट्यमच्या कटकमुख मुद्रेप्रमाणे तिची हातमुद्रा आहे. गुलाबी फुलावर एका पायावर उभी असलेली ही बॅलन्सिंग मूर्ती सर्वांचे लक्ष वेधून घेत होती. मिरवणुकीदरम्यान ढोल-ताशांच्या गजरात तरुणाई थिरकत होती, लेझीमचे खेळ सुरू होते आणि गुलालाची उधळण केली जात होती. पोलीस प्रशासन व पालिकेकडून चोख बंदोबस्त ठेवण्यात आला होता. बाप्पाला निरोप देताना प्रत्येक चेहऱ्यावर एक वेगळाच उत्साह आणि पुढील वर्षी पुन्हा भेटीच्या आशेसह साश्रू नयन दिसून येत होते. हा निरोप आनंदाचा, श्रद्धेचा आणि भावनेचा होता.