OBC Against Maratha Reservation GR: … तर मुंबई जाम करणार, वडेट्टीवारांचा सरकारला राज्यव्यापी बंदचा इशारा

मराठा आरक्षणासाठी काढण्यात आलेल्या जीआरविरोधात नागपुरात ओबीसी समाजाकडून तीव्र निदर्शने करण्यात आली. काँग्रेस नेते विजय वडेट्टीवार यांच्या नेतृत्वाखाली काढण्यात आलेल्या या मोर्चात, जीआर रद्द न झाल्यास मुंबईसह पुणे आणि ठाणे पूर्णपणे जाम करण्याचा इशारा वडेट्टीवार यांनी सरकारला दिला.  हैदराबाद गॅझेटच्या आधारे कुणबी जात प्रमाणपत्र वाटप सुरू झाल्याने ओबीसी आरक्षणावर अतिक्रमण होत असल्याचा आरोप ओबीसी संघटनांनी केला आहे. या परिस्थितीला कारणीभूत ठरणार्‍यांवर कारवाई करण्याची मागणी वडेट्टीवार यांनी केली.

तर दुसरीकडे, मनोज जरांगे पाटील यांनी वडेट्टीवार आणि काँग्रेसवर पलटवार करत, काँग्रेस पक्ष छगन भुजबळ यांच्या विचारांच्या आहारी गेल्याने तो संपणार असल्याचा दावा केला. नाशिकच्या इतिहासाचा हवाला देत, भुजबळांच्या विचारांचे अनुसरण करणाऱ्या नेत्यांचे राजकीय भवितव्य धोक्यात असल्याचे जरांगे पाटील म्हणाले. आरक्षणाच्या मुद्द्यावरून आता मराठा समाजाच्या मोर्चानंतर ओबीसी समाजाचे मोर्चे निघत असून, १७ तारखेला बीडमध्ये मंत्री भुजबळही एल्गार पुकारणार आहेत.