Ajit Pawar Poster Controversy : मुंबईनंतर पुण्यातही मफलरवाला पोस्टर; अजितदादांचा अपघात की घातपात? राजकीय वर्तुळात खळबळ

महाराष्ट्राच्या राजकारणात सध्या पोस्टरबाजीने लक्ष वेधले आहे. मुंबईनंतर आता पुणे शहरातही मफलर असलेले एक राजकीय पोस्टर झळकले आहे. पुण्याच्या डेक्कन परिसरात हे पोस्टर लावण्यात आले असून, यामुळे राजकीय वर्तुळात जोरदार चर्चा सुरू झाली आहे.

या पोस्टरवरील मजकूर सध्या विशेष चर्चेचा विषय ठरला आहे. त्यावर, अजित पवारांचा अपघात की घातपात? यामागे असलेल्यांना वाचवणारा नेता कोण? असा गंभीर प्रश्न विचारण्यात आला आहे. राष्ट्रवादी काँग्रेसशी संबंधित या घटनेमुळे राजकीय वर्तुळात अनेक तर्कवितर्क लावले जात आहेत.

हे पोस्टर अशा वेळी समोर आले आहे, जेव्हा १६ तारखेला मुंबईतील वाय.बी. चव्हाण सेंटर येथे रोहित पवार यांची पत्रकार परिषद होणार आहे. या पत्रकार परिषदेत रोहित पवार कोणत्या विषयावर भाष्य करणार, याची उत्सुकता वाढली आहे. मुंबईत यापूर्वीही अशाच प्रकारचे पोस्टर दिसले होते. त्यानंतर आता पुण्यातही ते दिसल्यामुळे राज्याच्या राजकारणात मोठी खळबळ उडाली आहे. या पोस्टरबाजीमुळे महाराष्ट्राच्या राजकारणातील नाट्यमय घडामोडी अधिक तीव्र झाल्याचे चित्र आहे.