Drone In Farm | शेतात ट्रॅक्टर नाही, थेट ड्रोनची एन्ट्री; मुळशीत अभिनव प्रयोग, व्हिडिओ बघाच

सध्या मुळशी तालुक्यात सोयाबीन आणि भात पिकांना कीड-रोगाचा धोका निर्माण झाला आहे. पावसाने खंड दिल्याने ही परिस्थिती उद्भवली असून, त्यामुळे शेतीचे नुकसान होण्याची शक्यता आहे. या गंभीर स्थितीची दखल घेत कृषी विभागाने तातडीने उपाययोजना केली आहे. विभागाच्या पुढाकाराने थेट बांधावर जाऊन ड्रोनद्वारे कीटकनाशक फवारणीचा अभिनव उपक्रम राबवण्यात येत आहे. मुळशी तालुक्यातील जवळपास शंभर एकर क्षेत्रावरील सोयाबीन आणि भात पिकांवर ड्रोनच्या माध्यमातून अचूक आणि प्रभावी औषध फवारणी करण्यात आली आहे. यामुळे शेतकऱ्यांना मोठ्या प्रमाणात दिलासा मिळाला असून, पिकांचे संरक्षण होण्यास मदत होणार आहे.

दरम्यान, पुण्यातूनच आणखी एका मोठ्या कारवाईची बातमी समोर आली आहे. चाकणमध्ये अन्न व औषध प्रशासनाने मोठी कारवाई करत १ कोटी १३ लाख रुपयांचा अवैध गुटखा जप्त केला आहे. गुटख्याची वाहतूक करणाऱ्या एका ट्रकचा तब्बल सहा तास पाठलाग केल्यानंतर चाकण-तळेगाव चौकात तो अडवण्यात आला. या कारवाईत विविध कंपन्यांचा पान मसाला आणि सुगंधित तंबाखू असा एकूण १ कोटी १३ लाख ५४ हजार ६०० रुपयांचा मुद्देमाल जप्त करण्यात आला. याप्रकरणी पाच जणांविरोधात बीएनएस (भारतीय न्याय संहिता) आणि अन्नसुरक्षा कायद्यानुसार गुन्हा दाखल करण्यात आला आहे.