शेतकरी कर्जमाफी संदर्भात विखे पाटलांचं वादग्रस्त विधान! म्हणाले…

भाजपचे मंत्री राधाकृष्ण विखे पाटील यांनी नुकतेच शेतकरी कर्जमाफी संदर्भात एक विधान केले, ज्यामुळे राज्यात वाद निर्माण झाला आहे. विखे पाटील यांनी शेतकऱ्यांच्या कर्जमाफीच्या मागणीवर भाष्य करताना, “सोसायटीचे कर्ज काढून पुन्हा कर्जबाजारी व्हायचे आणि त्यानंतर पुन्हा कर्जमाफी मागायची, हे अनेक वर्षे चालले आहे,” असे म्हटले होते. त्यांच्या या वक्तव्यामुळे शेतकरी आणि विरोधी पक्षांकडून तीव्र नाराजी व्यक्त करण्यात आली.

या वादग्रस्त विधानानंतर त्यांनी सारवासारव करत आपले म्हणणे स्पष्ट केले. विखे पाटील यांनी सांगितले की, त्यांचे हे विधान ग्रामपंचायत आणि सोसायटीच्या निवडणुकांच्या पार्श्वभूमीवर “हलक्याफुलक्या” पद्धतीने केलेले होते. शेतकऱ्यांनी कर्ज घेऊन पुन्हा कर्जबाजारी होऊ नये यासाठी उपाययोजना करण्याची आवश्यकता असल्याचे त्यांचे म्हणणे होते. मात्र, त्यांच्या या विधानाची चुकीची व्याख्या केली गेल्याचे त्यांनी नमूद केले. या घटनेमुळे महाराष्ट्रातील शेतकरी कर्जमाफीचा मुद्दा पुन्हा ऐरणीवर आला आहे.