विधानभवनाच्या पायऱ्यांवर विरोधकांचे आंदोलन; सातबारा कोराची मागणी

महाराष्ट्र विधानमंडळाच्या अर्थसंकल्पीय अधिवेशनादरम्यान, विरोधकांनी विधानभवनाच्या पायऱ्यांवर शेतकऱ्यांच्या प्रश्नावर तीव्र आंदोलन केले. शेतकऱ्यांचा सातबारा पूर्णपणे कोरा करावा, ही विरोधकांची प्रमुख मागणी आहे. यंदाच्या अर्थसंकल्पात सरकारने दोन लाखांपर्यंतचे कृषी कर्ज माफ करण्याची घोषणा केली आहे. मात्र, विरोधकांनी या घोषणेवर टीका करत, ही कर्जमाफी अपुरी असल्याचे म्हटले आहे.

सातबारा कोरा करा, नाहीतर खुर्च्या खाली करा, फसवणाऱ्या सरकारचा धिक्कार असो, शेतकरी उपाशी, मंत्री तुपाशी अशा घोषणा देत विरोधकांनी सरकारविरोधात तीव्र संताप व्यक्त केला. हातामध्ये शेतकऱ्यांचा सातबारा कोरा करा, निकषांचा खेळ सोडा असे बॅनर घेऊन त्यांनी घोषणाबाजी केली. विरोधकांचा आक्षेप आहे की, सरकारने अटी व शर्ती लावून शेतकऱ्यांना पूर्ण दिलासा दिला नाही, त्यामुळे संपूर्ण सातबारा कोरा होणे आवश्यक आहे. विधानभवनाच्या पायऱ्यांवरून सुरू असलेले हे आंदोलन शेतकऱ्यांच्या हक्कांसाठी विरोधकांनी आक्रमक भूमिका घेतल्याचे स्पष्ट करते.