Pandharpur Flood : सोलापूरला पावसानं झोडपलं, पंढरपुरातील चंद्रभागेला महापूर, मंदिरं पाण्यात… बघा भीषण आवस्था

उजनी आणि वीर धरणांच्या पाणलोट क्षेत्रात झालेल्या जोरदार पावसामुळे पंढरपूर येथील चंद्रभागा नदीला महापूर आला आहे. काल संध्याकाळी उजनी धरणातून १,१५,००० क्युसेक आणि वीर धरणातून ७,००० क्युसेक इतका विसर्ग भीमा नदीपात्रात सोडण्यात आला होता, ज्यामुळे हे पाणी आता पंढरपूरमध्ये पोहोचले आहे. चंद्रभागा नदी दुथडी भरून वाहत असून, नदीपात्रातील पुंडलिक मंदिर तसेच इतर छोटी मंदिरे पाण्याखाली गेली आहेत. इस्कॉन घाटावरील भाविकांसाठीचे स्नानगृह आणि कपडे बदलण्याचे हॉल देखील जलमय झाले आहेत.

याशिवाय, चंद्रभागा पात्रातील आठ कोल्हापूर पद्धतीचे बंधारेही पाण्याखाली आहेत. दिलासादायक बाब म्हणजे, आज सकाळी उजनी धरणातून पाण्याचा विसर्ग ५०,००० क्युसेकपर्यंत कमी करण्यात आला आहे. पावसाचे प्रमाणही घटल्याने चंद्रभागेला असलेला पुराचा धोका आता टळला आहे. आज दिवसभर पाण्याची पातळी जास्त असली तरी, आज संध्याकाळनंतर पाणी ओसरण्यास सुरुवात होण्याची शक्यता आहे.