Sanjay Raut Health : उद्धव ठाकरे संजय राऊत यांच्या भेटीसाठी थेट भांडूपमध्ये… सध्या राऊतांची प्रकृती कशी?

शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी पक्षाचे नेते आणि खासदार संजय राऊत यांच्या भांडुप येथील निवासस्थानी भेट देऊन त्यांच्या प्रकृतीची विचारपूस केली. मिलिंद नार्वेकर यांच्यासह ठाकरे हे राऊत यांच्या मैत्री निवासस्थानी पोहोचले होते. गेल्या काही दिवसांपासून संजय राऊत यांची प्रकृती खालावली असून, त्यांच्यावर फोर्टीस रुग्णालयात उपचार सुरू आहेत.

संजय राऊत यांनी स्वतः 30 ऑक्टोबर रोजी एका निवेदनाद्वारे जाहीर केले होते की ते गंभीर आजाराने त्रस्त असून दोन महिने सार्वजनिक आणि राजकीय कार्यक्रमांपासून दूर राहणार आहेत. सध्या त्यांच्यावर घरीच उपचार सुरू असून, ते नियमितपणे फोर्टीस रुग्णालयात उपचारांसाठी जातात. प्रकृती अस्वस्थ असतानाही संजय राऊत हे सामना वृत्तपत्रातील संपादकीय लिखाण आणि सोशल मीडियाद्वारे राजकीय घडामोडींवर लक्ष ठेवून आहेत. उद्धव ठाकरे यांच्या या भेटीमुळे राजकीय वर्तुळात चर्चांना उधाण आले आहे, परंतु ही भेट प्रामुख्याने राऊत यांच्या प्रकृतीची विचारपूस करण्यापुरती मर्यादित असल्याचे सांगण्यात आले.