Vidhan Parishad Election : भाजप उमेदवाराचा अर्ज दाखल; पण मित्रपक्षांच्या नेत्यांनी फिरवली पाठ, महायुतीत नेमकं काय सुरू?
पुणे पदवीधर आणि शिक्षक मतदार संघाच्या उमेदवारीवरून महायुतीमध्ये नाराजीनाट्य सुरू आहे. भाजप उमेदवारांच्या नामनिर्देशन पत्रावेळी मित्र पक्ष राष्ट्रवादी काँग्रेस आणि शिंदे यांच्या शिवसेनेचा एकही नेता उपस्थित नव्हता. यामुळे महायुतीतील समन्वयावर प्रश्नचिन्ह निर्माण झाले असून, राजकीय वर्तुळात याची चर्चा आहे.
पुणे पदवीधर आणि शिक्षक मतदार संघातून विधान परिषदेच्या उमेदवारीवरून सत्ताधारी महायुतीमध्ये अंतर्गत नाराजीनाट्य सुरू असल्याची चर्चा राजकीय वर्तुळात आहे. पुणे पदवीधर मतदार संघातील भाजप उमेदवारांच्या नामनिर्देशन पत्रावेळी महायुतीतील मित्र पक्षांनी दांडी मारल्याचे चित्र दिसले. भाजप उमेदवाराचा उमेदवारी अर्ज दाखल करताना मित्र पक्ष राष्ट्रवादी काँग्रेस आणि एकनाथ शिंदे यांच्या शिवसेनेचा एकही महत्त्वाचा नेता उपस्थित नव्हता. या अनुपस्थितीमुळे महायुतीमधील एकी आणि समन्वयावर प्रश्नचिन्ह निर्माण झाले आहे.
या घडामोडींनंतरही उमेदवारी अर्ज दाखल करण्याची प्रक्रिया सुरू आहे. आज पुणे पदवीधर मतदार संघासाठी स्मिता जाधव यांनी तर पुणे शिक्षक मतदार संघासाठी कौस्तुभ गावडे यांनी आपले उमेदवारी अर्ज दाखल केले. दुसरीकडे, शिंदे यांच्या शिवसेनेकडून उद्या मंगेश चिवटे हे पुणे शिक्षक मतदार संघासाठी आपला उमेदवारी अर्ज दाखल करणार आहेत. महायुतीमधील या मतभेदांमुळे आगामी विधान परिषद निवडणुकांमध्ये युतीमधील समन्वयाचा अभाव स्पष्टपणे दिसू शकतो, असे राजकीय विश्लेषकांचे म्हणणे आहे. या घडामोडींवर आता महायुतीचे नेते काय प्रतिक्रिया देतात, याकडे सर्वांचे लक्ष लागले आहे.
