Bihar Election Result 2020 | गुप्तेश्वर पांडेंचा डोळा असलेल्या बक्सरमधून तिकीट मिळालेल्या कॉन्स्टेबलची दमछाक

भाजपकडून परशुराम चौबेंना बक्सर विधानसभा मतदारसंघातून तिकीट देण्यात आलं

Anish Bendre | Updated on: Nov 10, 2020 | 4:20 PM

Bihar Election Result 2020 LIVE पाटणा : बिहार विधानसभा निवडणुकांचा निकाल (Bihar Vidhansabha Election Result) अवघ्या काही तासांमध्ये स्पष्ट होणार आहेत. बिहार निवडणुकीच्या मतमोजणी प्रक्रियेकडे सगळ्या देशाचं लक्ष लागलं आहे. बिहारचे माजी पोलीस महासंचालक गुप्तेश्वर पांडे (Gupteshwar Pandey) यांचा डोळा असलेल्या बक्सर मतदारसंघातून (Buxar Vidhansabha) तिकीट मिळालेल्या भाजप उमेदवाराची चांगलीच दमछाक होताना दिसत आहे. (Bihar Election Result 2020 Buxar Vidhansabha Result where Gupteshwar Pandey was eyeing LIVE Updates)

पोलीस कॉन्स्टेबल परशुराम चौबे (Parshuram Chaubey) यांनी राजकीय आखाड्यात उतरण्यासाठी सेवानिवृत्ती घेतली होती. भाजपच्या गोटात सामील झालेल्या चौबेंना बक्सर विधानसभा मतदारसंघातून तिकीट देण्यात आलं. खरं तर बिहारचे माजी पोलीस महासंचालक गुप्तेश्वर पांडे यांचा बक्सरवर डोळा होता. बक्सरमधून निवडणूक लढण्यासाठीच त्यांनी सेवानिवृत्ती घेत घाईघाईने नितीशकुमार यांच्या राजदमध्ये प्रवेशही केला. परंतु जागावाटपात बक्सर मतदारसंघ जेडीयूऐवजी एनडीएतील भाजपच्या वाट्याला गेला. त्यामुळे माजी पोलीस महासंचालकांऐवजी सेवानिवृत्त पोलीस कॉन्स्टेबलला तिकीट मिळालं.

सुरुवातीच्या कलांनुसार परशुराम चौबे यांनी बक्सरमधून आघाडी घेतली असली, तरी काँग्रेस उमेदवार संजय कुमार तिवारी यांनी चौबेंना टफ फाईट दिली. दोन्ही उमेदवारांमध्ये जेमतेम एक हजार मतांचा फरक आहे. तर तिसऱ्या क्रमांकावरील राष्ट्रीय लोकसमता पक्षाचे निर्मलकुमार सिंहसुद्धा मागे नाहीत.

BJP’s Parshuram Chaubey leads over Congress rival Sanjay Tiwari by 2,600 votes in Buxar seat. #BiharElection2020

— Press Trust of India (@PTI_News) November 10, 2020

पांडेंचं वेट अँड वॉच

‘शुभचिंतकांच्या फोननी मी हैराण झालोय, त्यांची चिंता मी समजू शकतो. मी सेवामुक्त झाल्याने निवडणूक लढवेन, अशी अनेकांची अपेक्षा होती. परंतु मी यावेळी निवडणूक लढवत नाही. माझं आयुष्य संघर्षमय होतं. मी जीवनभर जनतेची सेवा करत राहीन. कृपया संयम बाळगा आणि मला फोन करु नका” अशा भावना पांडे यांनी तिकीट न मिळाल्यानंतर सोशल मीडियावरुन व्यक्त केल्या होत्या. (Bihar Election Result 2020 Buxar Vidhansabha Result where Gupteshwar Pandey was eyeing LIVE Updates)

गुप्तेश्वर पांडे फेब्रुवारी 2021 मध्ये सेवानिवृत्त होणार होते, मात्र पाच महिने आधीच त्यांनी व्हॉलंटरी रिटायरमेंट घेतली. गुप्तेश्वर पांडे यांनी बिहारचे मुख्यमंत्री नितीश कुमार यांच्या उपस्थितीत जेडीयूमध्ये प्रवेश केला होता. बिहारचे पोलिस महासंचालक म्हणून व्हीआरसी घेतल्यावर पांडे राजकारणात प्रवेश करण्याच्या शक्यता वर्तवल्या जात होत्या, मात्र ते वारंवार फेटाळून लावत होते. अखेर या अटकळी खऱ्या ठरवत त्यांनी जेडीयूतून राजकारणात पाऊल ठेवलंच.