भाजपच्या संकटमोचकाचा थेट उद्धव ठाकरेंना फोन; महाराष्ट्रात काय घडतंय?

ठाकरे गटाचे नेते आणि माजी मुख्यमंत्री उद्धव ठाकरे यांचा आज वाढदिवस आहे. त्यामुळे उद्धव ठाकरे यांना शुभेच्छा देण्यासाठी राज्यभरातील शिवसैनिकांनी मातोश्री बाहेर गर्दी केली आहे. दुसरीकडे मनसे अध्यक्ष राज ठाकरे यांनीही मातोश्रीवर येऊन उद्धव ठाकरे यांना शुभेच्छा दिल्याने राजकीय वर्तुळात चर्चांना उधाण आलं आहे. या भेटीने दोन्ही ठाकरे बंधू राजकीय दृष्ट्या एकत्र आल्यावर शिक्कामोर्तबच झाल्याचं सांगितलं जात आहे. त्यातच भाजपचे संकटमोचक समजले जाणारे राज्याचे मंत्री गिरीश महाजन यांनीही उद्धव ठाकरे यांना शुभेच्छा देण्यासाठी फोन केल्याचं समोर आलं आहे. त्यामुळे राज्यात काही मोठ्या घडामोडी घडणार का? अशी चर्चा आता रंगली आहे.

गिरीश महाजन म्हणाले, उद्धवजींना मनापासून शुभेच्छा…हे भेटले ते भेटले काय वाईट आहे. देवेंद्रजींना सुद्धा त्यांनी सुंदर शुभेच्छा दिल्या होत्या. कायम भांडत राहिले पाहिजे असे काही नाही. वाढदिवस हा वेगळा प्रसंग असतो. राज ठाकरे भेटले यात वाईट काही नाही. चुकीचे काही झाले नाही. हळूहळू मनमिलाफ होतो आहे. मी सुद्धा फोन केला पण बोलणं झालं नाही. वाढदिवसाच्या शुभेच्छा दिल्याचं पाहिजे.

छगन भुजबळ यांनी देखील राज ठाकरे आणि उद्धव ठाकरे यांच्या भेटीबद्दल मोठे विधान केले. मंत्री छगन भुजबळ म्हणाले की, उद्धव ठाकरेंच्या वाढदिवसानिमित्त त्यांना शुभेछा. उदंड निरोगी आरोग्य लाभो अशी प्रार्थना करतो. राज ठाकरे भेटायला गेले याचे फारसे नवल वाटत नाही.  दोघे भाऊ आहेत आणि रक्ताचे नाते आहे. राज ठाकरे त्यांना दादू म्हणायचे. दोघे भेटले असतील तर आनंदाचं आहे. राजकीय कारणामुळे दुरावलेले भाऊ वाढदिवसानिमित्त एकत्र येत असतील तर वाईट वाटायचे कारण नाही.

एकनाथ खडसे यांचे जावई प्रांजल यांना पुणे पोलिसांनी ताब्यात घेतले असून रेव्ह पार्टी करताना त्यांना रंगेहात पकडण्यात आले. पुणे पोलिसांनी मध्यरात्री ही कारवाई केली. यासोबतच्या अजून काही जणांना ताब्यात घेण्यात आले असून सर्वांचे मेडिकल करण्यात आलंय. खडसेंच्या जावयाला ताब्यात घेताच मंत्री गिरीष महाजन यांनी प्रतिक्रिया दिली होती.