Rohit Pawar: नाशिकमध्ये सिंहस्थ कुंभमेळ्याचं आज ध्वजारोहण, रोहित पवारांचा सरकारला तिखट प्रश्न
Rohit Pawar Public Notice on Kumbha Mela: आज नाशिकमध्ये सिंहस्थ कुंभमेळ्याचं महाध्वजारोहण होत आहे. राष्ट्रपती द्रौपदी मुर्मू यांच्या हस्ते हे ध्वजारोहण होत असतानाच आमदार रोहित पवार यांनी जाहीर नोटीस देत मोठी खळबळ उडवून दिली आहे.
Rohit Pawar on Simhastha Kumbh Mela 2026: नाशिकमध्ये आज सिंहस्थ कुंभमेळ्याचं महाध्वजारोहण दुपारी होत आहे. राष्ट्रपती द्रौपदी मूर्म, राज्यपाल, मुख्यमंत्री, उपमुख्यमंत्र्यांसह अर्धेधिक मंत्रिमंडळ नाशकात असेल. त्याचवेळी शरदचंद्र पवार राष्ट्रवादीचे आमदार रोहित पवार यांनी कुंभ मेळ्यातील अनियमिततेवर बोट ठेवत अधिकाऱ्यांना एक जाहीर नोटीस दिली आहे. त्यांनी सरकारला तिखट सवाल केला आहे. त्यावरून आता एकच खळबळ उडाली आहे.
रोहित पवार यांचे गंभीर आरोप
रोहित पवार यांच्या जाहीर नोटीसमध्ये अनेक धक्कादायक आरोप करण्यात आले आहेत. या सिंहस्थ कुंभमेळ्यासाठी विविध शासकीय कामांमध्ये मोठ्या प्रमाणावर अनियमितता झाल्याचा आरोप पवार यांनी केला आहे. प्रशासकीय, प्रक्रियात्मक, तांत्रिक आणि पर्यावरणा संदर्भातील नियम धाब्यावर बसवल्याचा त्यांचा आरोप आहे. त्यांनी वृत्तपत्रात याविषयीची जाहीर नोटीस दिली आहे. सिंहस्थ कुंभमेळ्यासारख्या पवित्र आणि मोठ्या धार्मिक महोत्सवाच्या नावाखाली शासकीय यंत्रणा आर्थिक अनियमितता करत असल्याचा आरोप त्यांनी केला आहे.
अनेकदा तक्रारी तरीही दखल नाही
आमदार रोहित पवार यांची राज्य सरकारला आणि कुंभ अधिकाऱ्यांना वृत्तपत्राद्वारे जाहीर नोटिस दिली आहे. नाशिकमधील सिहस्थ कुंभमेळ्यातील अनेक कामा मधे अनियमितता झाल्या आहेत या अनियमितेच्या संदर्भात वारंवार अनेक तक्रारी सुधा आल्या होत्या पण सरकारकडून आणि अधिकाऱ्यांकडून त्याची दखल घेण्यात आली नाही, असा आरोप रोहित पवार यांनी केला. कुंभमेळ्यासाठी काम करणारे अनेक प्राधिकरण या प्रश्नाच्या संदर्भात उत्तरदायी असल्याचे ते म्हणाले.
अन्नदाता शेतकरी भीषण दुष्काळाच्या आगीत होरपळत असताना, हे सरकार त्याच्या हातावर ५ हजार रुपये टिकल्या टेकून त्याची थट्टा करणार आणि दुसऱ्या बाजूला नाशिक कुंभमेळ्याच्या नावाखाली केल्या जाणाऱ्या ३५,००० कोटी रुपये खर्चाचा कोणताही हिशोब द्यायला तयार नाही!
कुंभमेळ्याच्या निधीतून होणाऱ्या कामांमध्ये प्रचंड अनियमितता, निकृष्ट दर्जा आणि भ्रष्टाचाराचे गंभीर आरोप होतायेत. यातील काही माहिती आमच्याकडं असून सरकारकडूनही ही माहिती मिळतेय का हे पाहण्यासाठी एक लोकप्रतिनिधी म्हणून मी विविध शासकीय विभागांकडे पत्रव्यवहार केला, माहिती अधिकारात (RTI) अधिकृत अर्ज दिले; परंतु जाणीवपूर्वक ही माहिती दडवली जातेय. जनतेच्या घामाच्या पैशावर डल्ला मारणारे हे महाभाग कोण आणि त्यांना कोण पाठीशी घालतंय? सरकार माहिती का लपवतंय, हे आम्हाला पहायचंच…
पण माहिती दिली नाही म्हणून आम्ही थांबणार नाही. त्यासाठी आज थेट वृत्तपत्रात ‘जाहीर नोटीस’ प्रसिद्ध करून कायदेशीर लढाईचं रणशिंग फुंकलं. सर्व कायदेशीर हत्यारांचा वापर करून आम्ही ही लपवलेली माहिती बाहेर काढू. पवित्र कुंभमेळ्याच्या नावाखाली नक्की कुणाचे खिसे भरले गेले, याचा काळाबाजार जनतेच्या न्यायालयात आणल्याशिवाय हा लढा थांबणार नाही.
#नाशिक_कुंभमेळा #NashikKumbhMela
— Rohit Pawar (@RRPSpeaks) October 31, 2026
रोहित पवार यांचे जाहीर नोटीसद्वारे गंभीर आरोप
आमदार रोहित पवार यांनी या जाहीर नोटीसद्वारे कुंभ मेळ्यातील विविध कामातील अनियमितता झाल्याचा आरोप केला आहे.
निविदा प्रक्रियेत फेरफार: निविदा अटींमध्ये फेरफार केल्याचा आरोप त्यांनी केला आहे. मर्जीतील कंत्राटदारांना काम देण्यात आले. फायद्यासाठी नियमात बदल करण्यात आला. स्पर्धात्मक बोली प्रक्रियेला डावलण्यात आले.
डिजिटल गैरव्यवहारांचा आरोप: CCTV, AI या आधारित सुरक्षा यंत्रणा आणि इतर प्रणालींसी संबंधित कंत्राटावर त्यांनी आक्षेप नोंदवला. याविषयीच्या कागदपत्रांमध्ये फेरफार केल्याचा त्यांचा आरोप आहे.
पायाभूत सुविधांबाबत आक्षेप: रस्ते बांधकाम, पादचारी सुविधा, भूमिगत गटार आणि इतर स्थळांच्या उभारणीसाठी मोठा विलंब झाला. या कामावर देखरेख झाली नाही आणि योग्य अंमलबजावणी करण्यात आली नाही असा आरोप केला.
पर्यावरणाला ठेंगा: पूर्वपरवानगीशिवाय वृक्षतोड, गोदावरी नदी आणि तिच्या उपनद्यांचे प्रदूषण, औद्योगिक सांडपाण्याचा विसर्ग आणि पर्यावरणाविषयीच्या कायद्यांचे उघड उल्लंघन केल्याचा आरोप रोहित पवार यांनी या जाहीर नोटीसद्वारे केला आहे.
शासकीय निधीचा अपहार: रोहित पवार यांनी एकूणच कुंभमेळ्यातील कामावर नाराजी व्यक्त केली आहे. अनेकदा अनावश्यक सुधारीत अंदाजपत्रके सादर करण्यात आली. नाहक फेरबदल आदेश देण्यात आले. शासकीय निधीचा मोठ्या प्रमाणात अपहार झाल्याचा आरोप त्यांनी केला.
