Kalyan Snake Rescue : कल्याणमध्ये सर्पमित्रांकडून एकाच दिवशी चार सापांची सुटका

साप हा शेतकऱ्यांचा मित्र मानला जातो. कोणताही साप विषारी असतोच असे नाही. त्यामुळे कुठेही साप वा तत्सम प्राणी आढळून आल्यास त्यांना दुखापत करू नये. तात्काळ प्राणी-सर्प मित्रांशी संपर्क साधावा, असे आवाहन दत्ता बोंबे यांनी केले आहे.

कल्याणमध्ये सर्पमित्रांकडून एकाच दिवशी चार सापांची सुटकाImage Credit source: टीव्ही 9

Reporter Amjad Khan | Edited By: वैजंता गोगावले | Updated on: Mar 25, 2022 | 6:26 PM

कल्याण : उन्हाच्या काहिलीने समस्त प्राणी मात्रांच्या जीवनावर विपरीत परिणाम होऊ लागला आहे. साप (Snake) हा थंड ठिकाणी राहणारा प्राणी असल्याने गर्मीच्या ठिकाणांहून थंड ठिकाणी वास्तव्य करण्याकरीता विषारी आणि बिनविषारी सर्प बाहेर पडू लागले आहेत. थंडाव्याच्या शोधात मानवी वस्तीत आलेल्या 4 सापांना गुरूवारी दिवसभरात रेस्क्यू (Rescue) करण्यात आले. यात एक इंडियन कोब्रा नाग, एक विषारी घोणस, एक धामण आणि एक रसेल कुकरीचा समावेश आहे. (Rescue of four snakes in one day from animal rescue team in Kalyan)

चार विषारी आणि बिनविषारी सापांची सुटका

कल्याण-मुरबाड रोडला असलेल्या सेंचुरी कंपनीतून गुरूवारी सकाळी नऊ वाजता फोन आला. एक नाग पकडल्याचे कळताच सर्पमित्र दत्ता बोंबे यांनी घटनास्थळी जाऊन खात्री केली. अत्यंत घातक अशा कोब्रा नागाला बिर्ला स्कूल येथून सेंचुरीच्या फायरने पकडून आणले होते. या नागाला घेऊन कल्याणच्या वन विभागाकडे आणण्यात आले. वन अधिकाऱ्यांना कळविण्यात आले. कल्याण जवळच्या उंबर्डे येथील डम्पिंग रोडच्या बाजूला साईटचे काम चालू आहे. त्यांच्या ऑफिसजवळ 4 फुटी विषारी घोणस आली होती. साईटवर असलेल्या एका व्यक्तीने कॉल केला होता. त्यानंतर अर्ध्या तासाने उंबर्डे शंकर मंदिराजवळ घराच्या भिंतीमधील धामण जातीच्या सापाची सुटका करण्यात आली.

आधारवाडी तुरूंग अधिक्षकांच्या बंगल्यामागे रसेल कुकरी नावाचा साप पकडण्यात आला. तोही बिनविषारी साप होता. या सर्व सापांना वन खात्याला दाखवून नंतर निसर्गात मुक्त करण्यात येणार असल्याचे सर्पमित्र दत्ता बोंबे यांनी सांगितले. गुरूवारी सकाळपासून चार साप आढळून आले. साप हा शेतकऱ्यांचा मित्र मानला जातो. कोणताही साप विषारी असतोच असे नाही. त्यामुळे कुठेही साप वा तत्सम प्राणी आढळून आल्यास त्यांना दुखापत करू नये. तात्काळ प्राणी-सर्प मित्रांशी संपर्क साधावा, असे आवाहन दत्ता बोंबे यांनी केले आहे. तर सर्व सापांना वन विभागाच्या परवानगीने निर्सगाच्या सानिध्यात सोडणार आल्याची माहिती सर्पमित्र दत्ता बोंबे यांनी दिली आहे. (Rescue of four snakes in one day from animal rescue team in Kalyan)