वनसाईड विजयाचा दावा करणाऱ्या काँग्रेसला भाजपने कसा दिला धोबीपछाड

हरियाणा आणि जम्मू काश्मीरचा निकाल लागला आणि मुख्य नजरा असलेल्या हरियाणात भाजपचा मोठा विजय झाला. तर जम्मू काश्मीर नॅशनल कॉन्फरन्स आणि काँग्रेसच्या खात्यात गेलं. मात्र हरियाणात 60 हून अधिक जागांचा दावा करणाऱ्या काँग्रेसला मोठा फटका बसला. 90 विधानसभेच्या हरियाणात भाजपनं स्पष्ट बहुमताच्या पुढे जात 48 जागा जिंकल्या. तर काँग्रेसचे 37 आमदार निवडून आले आहेत. आयएन एलडीचे 2 तर 3 अपक्ष आमदार निवडून आले आहेत. विशेष म्हणजे 2019च्या तुलनेत भाजपच्या 8 जागा अधिक निवडून आल्यात. हरियाणात भाजपच्या विजयाची मुख्य कारणं काय राहिलीत त्यावर एक नजर टाकुयात.

हरियाणात भाजपनं जातीय समीकरण साधलं, काँग्रेसनं जवळपास 21 % असलेल्या जाट आणि दलित समुदायावर भर दिला तर भाजपनं 35 % ओबीसींसह सवर्ण मतदारांवर खास मोर्चा वळवला. दलित आणि जाट मतदारांवर निर्भर मायावतींच्या बसपाची आघाडी आणि जेजेपी आघाडी अशा 2 वेगवेगळ्या आघाड्यांमुळं मतांचं विभाजन होऊन काँग्रेसला फटका बसला. ऐन निवडणुकीच्या काही महिन्यांआधी मुख्यमंत्री बदलून ओबीसी चेहरा देत भाजपनं अॅन्टिइकंबन्सी कमी केली. 5 महिन्याआधीच मनोहर लाल खट्टरांच्या ऐवजी नायब सिंग सैनींना मुख्यमंत्री करुन भाजपनं बाजी पलटली.

जम्मू काश्मीरमध्ये इंडिया आघाडीला बहुमत

जम्मू काश्मीरमध्ये अपेक्षेप्रमाणं फारुक अब्दुल्ला यांच्या नॅशनल कॉन्फरन्स आणि काँग्रेस आघाडीला बहुमत मिळालंय. कलम 370 हटवल्यानंतर, पहिल्यांदाच जम्मू काश्मीर विधानसभेच्या निवडणुका झाल्यात. ज्यात जम्मू काश्मीरच्या जनतेनं नॅशनल कॉन्फरन्स आणि काँग्रेस आघाडीला पाठींबा दिला.

जम्मू काश्मीरच्या 90 विधानसभेच्या जागांपैकी नॅशनल कॉन्फरन्स आणि काँग्रेस आघाडीला 48 जागा मिळाल्यात. ज्यात नॅशनल कॉन्फरन्सला 42 जागा आणि काँग्रेसचे 6 आमदार निवडून आलेत. भाजपचे 29 आमदार निवडून आलेत. मेहबुबा मुफ्तींच्या पीडीपीला 3 जागा मिळाल्यात. जम्मू काश्मीर पीपल्स कॉन्फरन्सला 1 जागा आणि इतरांना 7 जागा मिळाल्यात.

ओमर अब्दुलाच मुख्यमंत्री होतील – फारुख अब्दुला

बहुमत मिळाल्यानंतर फारुक अब्दुल्लांनी, त्यांचे पुत्र ओमर अब्दुल्लाच मुख्यमंत्री होतील, अशी घोषणाही केली. याआधी 2014 मध्ये जम्मू काश्मीरमध्ये विधानसभेच्या निवडणुका झाल्या होत्या. ऑगस्ट 2019 मध्ये मोदी सरकारनं कलम 370 हटवलं. आता जम्मू काश्मीरच्या जनतेनं नॅशनल कॉन्फन्स आणि काँग्रेसच्या बाजूनं मतदान केलं.

हरियाणा आणि जम्मू काश्मीर या 2 निवडणुकांपैकी हरियाणात काँग्रेस भाजपची हॅटट्रिक रोखणार असे दावे केले जात होते. मात्र, हरियाणाच्या जनतेनं भाजपलाच निवडून दिलेय.