थेट शेंदूर फासलेल्या दगडाशी तुलना, राज ठाकरे यांच्या ‘त्या’ टीकेनंतर संजय राऊत यांचीही खोचक टीका

नवी दिल्ली : मनसेचे अध्यक्ष राज ठाकरे यांनी काल एका मुलाखतीत माजी मुख्यमंत्री उद्धव ठाकरे आणि आदित्य ठाकरे यांच्यावर टीका केली होती. दोघेही स्वयंभू आहेत. त्यामुळे मी त्यांना काहीच सल्ला देऊ शकत नाही, असा खोचक टोला राज ठाकरे यांनी लगावला होता. राज ठाकरे यांच्या या टीकेचा ठाकरे गटाचे नेते संजय राऊत यांनी समाचार घेतला आहे. राऊत यांनी राज ठाकरे यांची तुलनाच शेंदूर फासलेल्या दगडाशी केली आहे. त्यामुळे आता मनसेकडून राऊत यांना काय उत्तर दिलं जातं याकडे सर्वांचं लक्ष लागलं आहे.

होय, आम्ही स्वयंभू आहोत. जे स्वयंभू दैवत असते त्याच्या मागे जनता जाते. जे शेंदूर फासलेले असतात त्यांच्या मागे कुणी जात नाही. दगडांना शेंदूर फासतात आणि यांनाच देव माना असं सांगतात. त्यांना लोकं वाकून नमस्कार करत नाहीत. जे स्वयंभू असतात त्या नेत्यांना आणि दैवतांनाच श्रद्धेचा मान मिळतो. तो ठाकरेंना मिळतो. कुणाची पोटदुखी होत असेल तर त्यांनी यावं. आमच्याकडे औषध आहे, असं संजय राऊत म्हणाले.

तो विषय देशात गेला पाहिजे

संजय राऊत हे भाजप नेते सत्यपाल मलिक यांना भेटणार आहेत. पुलवामा प्रकरणात ज्या प्रकारचे स्फोट त्यांनी केले ते राजकीय सुरक्षेच्या दृष्टीने महत्त्वाचे आहेत. हा विषय मीडियात पोहोचू नये म्हणून दबाव आणला गेला. तो विषय देशात जायला हवा. मलिक महत्त्वाचे नेते आहेत. ते सक्रिय आहेत. पुढील राजकारणात काय मदत होऊ शकेल हे समजून घ्यायचं आहे. त्यामुळेच मी सत्यपाल मलिक यांची आज भेट घेणार आहे, असं संजय राऊत म्हणाले.

लोक मरायलाही तयार

बारसू रिफायनरी आंदोलनावरही त्यांनी प्रतिक्रिया व्यक्त केली. लोकं रस्त्यावर उतरले आहेत. मरायला आणि मारायला तयार आहेत. लोकांना विनाशकारी प्रकल्प नकोय. जमावबंदी तरीही लोकं जमत आहेत. लोकभावनेचा आदर सरकार करत नसेल तर लोकशाहीला अर्थ काय. शिवसेनेच्या आमदारांबद्दल बोलू नंतर. पण आमचे खासदार तिथे आहेत. आम्ही कुठेही हटलो नाही. उद्धव ठाकरे आंदोलकांसोबत आहे. उद्धव ठकारेही तिथे जातील, असं ते म्हणाले.