Raja Shivaji : हर हर महादेव! ‘राजा शिवाजी’ चित्रपटाची सर्वाधिक कमाई; रितेश देशमुखच्या नावावर सर्वांत मोठा रेकॉर्ड
अभिनेता रितेश देशमुखच्या 'राजा शिवाजी' या चित्रपटाने नवा विक्रम रचला आहे. हा चित्रपट सर्वाधिक कमाई करणारा मराठी सिनेमा ठरला आहे. भारतातील ग्रॉस कलेक्शनचा आकडा 100 कोटी रुपयांच्या पार पोहोचला आहे.
जिओ स्टुडिओज आणि मुंबई फिल्म कंपनी निर्मित, रितेश विलासराव देशमुख दिग्दर्शित 'राजा शिवाजी' या चित्रपटाने देशांतर्गत आणि परदेशातही बॉक्स ऑफिसवर आपली पकड कायम ठेवली आहे. भारतात 93 कोटी रुपयांची निव्वळ आणि जगभरात 114.80 कोटी रुपयांची एकूण कमाई करून 'राजा शिवाजी' हा आतापर्यंतचा सर्वाधिक कमाई करणारा मराठी चित्रपट ठरला आहे.
1 / 5
ऐतिहासिक ओपनिंगसह विक्रमांची नोंद केल्यानंतर आणि पहिल्या दोन आठवड्यांत उल्लेखनीय सातत्य राखल्यानंतर, छत्रपती शिवाजी महाराजांना वाहिलेल्या या महाकाव्याला तिसऱ्या वीकेंडमध्येही प्रेक्षकांचा मोठा प्रतिसाद मिळाला. मराठी आणि हिंदी अशा दोन्ही आवृत्त्यांमध्ये मिळालेल्या उत्कृष्ट मौखिक प्रसिद्धी आणि कौतुकामुळे, चित्रपटाला प्रेक्षकांचा भक्कम प्रतिसाद मिळत आहे.
2 / 5
'राजा शिवाजी' या चित्रपटाने पहिल्या आठवड्यात 57.70 कोटी रुपये, दुसऱ्या आठवड्यात 27 कोटी रुपये, प्रदर्शनाच्या पंधराव्या दिवशी 1.70 कोटी रुपये, सोळाव्या दिवशी 2.90 कोटी रुपये, सतराव्या दिवशी 3.80 कोटी रुपये कमावले. यासह भारतातील एकूण नेट कलेक्शनचा आकडा 93.10 कोटी रुपयांवर आणि ग्रॉस कलेक्शनचा आकडा 109.90 कोटी रुपयांवर पोहोचला आहे.
3 / 5
परदेशातही रितेश देशमुखच्या या चित्रपटाला चांगला प्रतिसाद मिळतोय. या चित्रपटाने परदेशात एकूण 4.90 कोटी रुपयांचा गल्ला जमवला आहे. तर जगभरातील एकूण कमाई 114.80 कोटी रुपयांवर पोहोचली आहे. तिसऱ्या आठवड्यातील दमदार कामगिरीमुळे 'राजा शिवाजी' हा चित्रपट मराठी चित्रपटसृष्टीतील एक महत्त्वपूर्ण ब्लॉकबस्टर यशस्वी चित्रपट म्हणून उदयास येत आहे.
4 / 5
'राजा शिवाजी' हा रितेशच्या करिअरमधील चौथा यशस्वी मराठी चित्रपट ठरला आहे. याआधी 'लय भारी', 'माऊली' आणि 'वेड' या त्याच्या चित्रपटांना प्रेक्षकांकडून दमदार प्रतिसाद मिळाला होता. 'राजा शिवाजी' या चित्रपटाने मराठीतील 'सैराट'चा विक्रम मोडला आहे.
