Marathi News Photo gallery White Shirt Collar Cleaning : Remove Yellow Stains Effectively By Using These Tips
Tips & Tricks : पांढऱ्या शर्टच्या कॉलरवरील पिवळे डाग कसे घालवाल ? या सोप्या ट्रिक्स ठरतील फायदेशीर
पांढऱ्या शर्टच्या कॉलरवर येणारे पिवळे डाग घाम, तेल आणि धूळ यामुळे खराब दिसतात. पण काही सोपे, घरगुती उपाय वापरून हे डाग प्रभावीपणे काढता येतात. घ्या जाणून सविस्तर..
पांढरा शर्ट कोणत्याही प्रसंगी आकर्षक दिसतो. मात्र, तो स्वच्छ ठेवणे अनेकदा आव्हानात्मक ठरते. विशेषतः शर्टची कॉलर काही वेळा वापरल्यानंतर पिवळी पडू लागते. घाम, त्वचेवरील तेल आणि धूळ यांमुळे मानेजवळील भागावर डाग जमा होतात. अनेकदा संपूर्ण शर्ट स्वच्छ असला, तरी कॉलरवरील पिवळसर डागांमुळे त्याचा लुक खराब होतो. अशा वेळी काही सोप्या घरगुती उपायांच्या मदतीने कॉलर स्वच्छ ठेवता येऊ शकते. ( All Image Source | iStock)
1 / 8
कॉलरवरील पिवळे डाग काढण्यासाठी बेकिंग सोडा उपयोगी ठरू शकतो. यासाठी थोड्या बेकिंग सोड्यात पाणी मिसळून घट्ट पेस्ट तयार करा. ही पेस्ट कॉलरवरील डाग असलेल्या भागावर लावा आणि २० ते ३० मिनिटे राहू द्या. यानंतर मऊ ब्रशच्या मदतीने कॉलर हलक्या हाताने घासा. नंतर स्वच्छ पाण्याने धुऊन शर्ट नेहमीप्रमाणे धुवा. हा उपाय हलक्या आणि मध्यम स्वरूपाच्या डागांसाठी मदत करू शकतो. मात्र, पेस्ट वापरण्यापूर्वी शर्टच्या नजरेस न पडणाऱ्या भागावर चाचणी करून घ्या.
2 / 8
कॉलरवर जुने आणि हट्टी डाग असतील, तर पांढरे व्हिनेगर हा आणखी एक पर्याय आहे. डाग पडलेल्या भागावर थोडे व्हिनेगर लावा आणि काही मिनिटे तसेच ठेवा. त्यानंतर कपडा पाण्याने व्यवस्थित धुऊन डिटर्जंटच्या मदतीने स्वच्छ करा. मात्र, व्हिनेगरचा वापर करताना काळजी घ्या. ते इतर क्लीनरसोबत थेट मिसळू नका. बेकिंग सोडा आणि व्हिनेगर एकत्र केल्यावर फेस तयार होतो; परंतु त्यामुळे डाग काढण्याची क्षमता हमखास वाढते असे नाही. त्यामुळे हे दोन्ही पदार्थ स्वतंत्रपणे वापरणे अधिक योग्य ठरते.
3 / 8
कॉलरवरील पिवळे डाग खूप जुने असतील आणि सामान्य डिटर्जंटने निघत नसतील, तर पांढऱ्या कपड्यांसाठी योग्य असलेल्या ऑक्सिजन ब्लीचचा विचार करता येईल. हे ब्लीच अनेक प्रकारचे डाग कमी करण्यास आणि कपड्यांचा पांढरेपणा टिकवण्यास मदत करू शकते. त्याचा वापर करण्यापूर्वी पॅकेटवरील सूचना काळजीपूर्वक वाचा. योग्य प्रमाण आणि वापरण्याचा कालावधी यांचे पालन करा. तसेच, शर्टवरील केअर लेबल तपासून घ्या. क्लोरीन ब्लीचचा चुकीचा किंवा वारंवार वापर केल्यास कपड्यांचे तंतू कमकुवत होऊ शकतात.
4 / 8
शर्ट थेट वॉशिंग मशीनमध्ये धुतल्याने कॉलरवरील साचलेली घाण नेहमीच पूर्णपणे निघेल असे नाही. त्यामुळे शर्ट धुण्यापूर्वी काही वेळ पाण्यात भिजत ठेवणे फायदेशीर ठरू शकते. एका बादलीत पाणी घेऊन त्यात कपड्यांसाठी योग्य डिटर्जंट मिसळा. त्यानंतर शर्ट २० ते ३० मिनिटे भिजत ठेवा. कॉलरवर जास्त डाग असतील, तर त्या भागावर थोडे डिटर्जंट लावून हलक्या हाताने स्वच्छ करा. त्यानंतर शर्ट नेहमीप्रमाणे धुवा. मात्र, शर्ट जास्त वेळ पाण्यात भिजत ठेवू नका. यामुळे काही प्रकारच्या कपड्यांच्या रंगावर किंवा गुणवत्तेवर परिणाम होऊ शकतो.
5 / 8
पांढऱ्या शर्टची कॉलर स्वच्छ ठेवण्यासाठी डाग काढण्याबरोबरच योग्य काळजी घेणेही महत्त्वाचे आहे. शर्ट घातल्यानंतर कॉलरवर घाम आणि घाण जमा झाली असेल, तर तो अनेक दिवस मळलेल्या कपड्यांच्या टोपलीत ठेवू नका. शक्य तितक्या लवकर शर्ट धुवा.
6 / 8
कॉलरवर डाग दिसू लागताच त्यावर योग्य डिटर्जंट लावून हलक्या हाताने स्वच्छ करा. नियमित स्वच्छता आणि योग्य धुलाईच्या पद्धतीमुळे कॉलरवरील डाग वाढण्यापासून रोखण्यास मदत होऊ शकते.
7 / 8
डिस्क्लेमर : या लेखातील माहिती सामान्य माहितीसाठी आहे. कोणतxही क्लीनर वापरण्यापूर्वी कपड्यावरील केअर लेबल आणि उत्पादनावरील सूचना तपासा. प्रत्येक प्रकारच्या कपड्यासाठी सर्व उपाय योग्य असतीलच असे नाही.
