5G साठी घ्यावे लागेल का नावाने सिम कार्ड? काय असेल डेटा प्लॅन? अनेकांना पडले आहेत हे पाच प्रश्न
देशात 5G सेवेचे उदघाट्न झाल्यानंतर अनेकांच्या मनात याच्या वापराबद्दल प्रश्न निर्माण झालेले आहेत. जाणून घेऊया या प्रश्नांची उत्तरं
मुंबई, पंतप्रधान नरेंद्र मोदी (PM Modi) यांच्या हस्ते काल भारतात 5G सेवेचे (5G Service In India) उदघाटन झाले. यावेळी पंतप्रधानांनी Jio, Airtel आणि Vi च्या 5G सेवेचा डेमो देखील पाहिला. अनेकांच्या फोनमध्ये 5G सिग्नलही येऊ लागले आहेत. यामुळे भारत 5G नेटवर्क उपलब्ध असलेल्या देशांच्या यादीत सामील झाला आहे. तूर्तास 5G सेवा संपूर्ण देशभरात सुरु झालेली नसली तरी लवकरच ती सुरु होईल. 5G सेवेशी संबंधित अनेकांच्या मनात काही प्रश्न आहेत. या सेवेचा लाभ कोणाला आणि कसा घेता येणार? यासाठी काय करावे लागेल? अशाच काही प्रश्नांची उत्तरे आपण जाणून घेणार आहोत.
कोणत्या फोनमध्ये 5G सेवा असेल?
साहजिकच सर्वात आधी कोणाच्याही मनात प्रश्न येईल की त्यांच्या फोनमध्ये 5G सेवा चालेल की नाही. याचे उत्तर तुमच्या सध्याच्या फोनवर अवलंबून आहे. जर तुम्ही 4G स्मार्टफोन वापरत असाल तर तुम्ही त्यावर 5G सेवा वापरू शकणार नाही. तुमचा सध्याचा फोन 5G आहे, तर तुम्हाला सेवा वापरता येईल.
नवीन हँडसेट घ्यावा लागणार का?
सध्या, लोकांकडे उपलब्ध असलेले बहुतेक 5G फोन हे प्री-स्पेक्ट्रम लिलाव आहेत. अशा परिस्थितीत अनेक यूजर्स त्यांच्या फोनमध्ये 5G सिग्नलचा पर्याय येत नसल्याची तक्रार करत आहेत. यासाठी युजरला सॉफ्टवेअर अपडेट करावे लागेल. याशिवाय तुम्ही स्मार्टफोन ब्रँडच्या वेबसाइटला भेट देऊन तुमच्या फोनमध्ये 5G सपोर्ट आहे की नाही हे देखील तपासू शकता.
5G सिम कार्ड देखील विकत घ्यावे लागेल का?
आतासाठी, नाही. अलीकडेच एअरटेलच्या सीईओने ग्राहकांना लिहिलेल्या पत्रात ही माहिती दिली आहे. एअरटेलची सेवा सध्याच्या सिमकार्डवरच उपलब्ध असेल असे त्यांनी सांगितले. यासाठी ग्राहकांना नवीन सिमकार्डची गरज भासणार नाही.
इतर कंपन्यांबद्दल बोलायचे झाल्यास, Jio आणि Vi वापरकर्ते देखील जुन्या सिम कार्डवर 5G सेवा वापरण्यास सक्षम असतील. कदाचित नंतर टेलिकॉम कंपन्या हळूहळू सिम कार्ड अपडेट करतील.
कोणत्या शहरांना मिळणार 5G सेवा?
एअरटेलची 5G सेवा 8 शहरांमध्ये लाइव्ह झाली आहे. कंपनीने कालपासून 5G सेवा देण्यास सुरुवात केली आहे. तुम्ही दिल्ली, मुंबई, कोलकाता, बंगळुरू, चेन्नई, वाराणसी, सिलीगुडी आणि हैदराबादमध्ये राहत असाल तर तुम्ही निवडक ठिकाणी 5G सेवा वापरून पाहू शकता.
एअरटेलने म्हटले आहे की मार्च 2024 पर्यंत ते त्यांची 5G सेवा देशभरात पोहोचवतील. तथापि, जिओबद्दल बोलताना, कंपनी दिल्ली, मुंबई, कोलकाता आणि चेन्नई या चार शहरांमध्ये दिवाळीपर्यंत आपली सेवा लाइव्ह करेल. याशिवाय संपूर्ण देशात कंपनी पुढील वर्षाच्या अखेरीस सेवा देण्यास सक्षम असेल.
Vi ने अद्याप 5G सेवा सुरू करण्याची कोणतीही तारीख जाहीर केलेली नाही. ग्राहकांच्या गरजेनुसार ही सेवा सुरू करणार असल्याचे कंपनीचे म्हणणे आहे. सुरुवातीला, कंपन्यांनी देशातील 13 शहरांमध्ये 5G सेवा देण्याची योजना आखली आहे.
रिचार्ज प्लॅनची किंमत किती असेल?
हा सर्वात महत्त्वाचा प्रश्न आहे. अद्याप कोणत्याही टेलिकॉम कंपनीने आपल्या रिचार्ज प्लॅनचा खुलासा केलेला नाही. तसेच योजना कधी सुरू होतील हे देखील सांगितलेले नाही. प्लॅनपूर्वी टेलिकॉम कंपन्या त्यांची सेवा लाईव्ह करतील. मुकेश अंबानी यांच्या मते इतर देशांच्या तुलनेत भारतात 5G सेवा परवडणारी असेल.
