गुंडशाही दडपशाहीमुळे जगणे मुश्किल! अंबादास दानवेंचा गंभीर आरोप

महाराष्ट्रातील राजकारणात सध्या गुंडशाही आणि दडपशाहीमुळे सर्वसामान्यांचे जगणे मुश्किल झाले आहे असा गंभीर आरोप अंबादास दानवे यांनी केला आहे. दानवे यांनी भाजपचे माजी नगरसेवक दामू अण्णा शिंदे यांच्यावर अशोक कुलकर्णी नावाच्या व्यक्तीला मारहाण करून त्याचे घर परस्पर विकल्याचा आरोप केला. या प्रकरणात पोलिसांनी साधा गुन्हाही नोंदवला नसल्याचे दानवे यांनी नमूद केले.

या सर्व प्रकारामागे मंत्री अतुल सावे यांचा दबाव असल्याचे दानवे यांचे म्हणणे आहे. अतुल सावे यांच्या आशीर्वादानेच अशा घटना घडत असून, ते आपल्या निकटवर्तीयांसाठी सर्वस्व लावण्यास तयार असल्याचे दानवे म्हणाले. सावे यांच्यावर खोटे गुन्हे दाखल करणे आणि खरे गुन्हेगार वाचवण्याचा आरोपही त्यांनी केला. धनंजय मुंडे यांच्या राजीनाम्याच्या प्रकरणाची आठवण करून देत, दानवे यांनी अतुल सावेंच्या भूमिकेवर प्रश्नचिन्ह उपस्थित केले आहे.