Supriya Sule : भावावर आरोप होताच बहीण पुढं आली… दमानियांच्या अजितदादांवरील आरोपानंतर सुप्रिया सुळे काय म्हणाल्या?

अंजली दमानियांनी उपमुख्यमंत्री अजित पवार यांच्यावर गंभीर आरोप केले आहेत. मुंबईतील गोवंडी येथे बीएमसीने ५०० कोटी रुपये खर्चून बांधलेले शताब्दी रुग्णालय अजित पवारांच्या नातेवाईकांना पीपीपी (सार्वजनिक-खाजगी भागीदारी) तत्त्वावर देण्याचा प्रयत्न सुरू असल्याचा दावा दमानियांनी केला आहे. हे लोकांच्या पैशातून बांधलेले रुग्णालय राजकारण्यांच्या घशात घालण्याचा मोठा घोटाळा असल्याचे त्यांचे म्हणणे आहे. या आरोपांवर राष्ट्रवादी काँग्रेसच्या खासदार सुप्रिया सुळेंनी प्रतिक्रिया दिली आहे.

दमानियांच्या आरोपांवर भाष्य करताना सुप्रिया सुळेंनी स्पष्ट केले की, तेरणा ट्रस्टचे कामकाज आता राणा जगजितसिंह पाटील यांच्याकडे आहे. पाटील हे धाराशिव येथील कथित ड्रग्ज प्रकरणामध्ये अडकले होते आणि त्यांनी भाजपमध्ये प्रवेश केला आहे. सुप्रिया सुळेंनी अंजली दमानियांना उद्देशून सांगितले की, तेरणा ट्रस्ट हा जरूर पद्मसिंह पाटील यांचा आहे, परंतु तो केवळ अजित पवार आणि सुनेत्रा पवारांपुरता मर्यादित नाही. ज्या राणा जगजितसिंह पाटलांवर ड्रग्ज प्रकरणात गुंतल्याचा आरोप आहे आणि ज्यांनी तुळजाभवानी मंदिरासारख्या श्रद्धास्थानाच्या परिसरात ड्रग्सचा व्यवसाय केला, त्यांना भाजपने पक्षात घेतले आहे. तेच आता या ट्रस्टची देखभाल करतात, त्यामुळे हा प्रश्न केवळ पवार कुटुंबापुरता सीमित नसल्याचे सुळेंनी नमूद केले.