शरद पवार गटाला धक्का! मुख्यमंत्र्यांच्या उपस्थितीत अण्णासाहेब डांगेंचा भाजपात प्रवेश

सांगली जिल्ह्यातील ज्येष्ठ नेते अण्णासाहेब डांगे यांनी आज भारतीय जनता पक्षात (भाजप) प्रवेश केला. त्यांच्यासोबत त्यांचे दोन पुत्र, चिमण डांगे आणि विश्वनाथ डांगे, यांनीही भाजपमध्ये सामील होण्याचा निर्णय घेतला. मुंबईत मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांच्या उपस्थितीत हा पक्षप्रवेशाचा सोहळा पार पडला. यावेळी अण्णासाहेब डांगे यांच्यासह त्यांचे अनेक समर्थक आणि कार्यकर्तेही भाजपमध्ये दाखल झाले.

अण्णासाहेब डांगे यांनी यापूर्वी काँग्रेसला राज्यात सत्तेपासून दूर ठेवण्यात महत्त्वपूर्ण भूमिका निभावली होती. राष्ट्रीय स्वयंसेवक संघाच्या (RSS) प्रभावाखाली त्यांचे नेतृत्व घडले होते. कालांतराने त्यांनी शरद पवार यांच्या राष्ट्रवादी काँग्रेस पक्षात प्रवेश केला होता, परंतु त्यानंतर ते राजकारणात फारसे सक्रिय राहिले नव्हते. आता त्यांनी पुन्हा भाजपमध्ये परतण्याचा निर्णय घेतला आहे. डांगे यांच्या या पक्षप्रवेशामुळे सांगली जिल्ह्यात भाजपची ताकद वाढण्याची शक्यता आहे, तर राष्ट्रवादी काँग्रेस (शरदचंद्र पवार) पक्षाचे नेते जयंत पाटील यांना याचा धक्का बसू शकतो.