Ashish Shelars Badve Remark : आशिष शेलार यांच्या बडवे टीकेवरुन वादंग, थेट पंढरपुरातनं फोन अन् शेलार म्हणाले…

भाजप नेते आशिष शेलार यांनी एका पत्रकार परिषदेत वापरलेल्या बडवे या शब्दावरून नवा राजकीय वाद निर्माण झाला आहे. या वक्तव्यामुळे पंढरपुरातील एका तरुणाने संताप व्यक्त करत थेट आशिष शेलार यांना फोन केला आणि जाब विचारला. तरुण भाजपचा समर्थक असूनही, त्याने शेलारांच्या वक्तव्यावर तीव्र नाराजी व्यक्त केली.

या संभाषणादरम्यान, तरुणाने बडवे समुदायाच्या ऐतिहासिक योगदानावर प्रकाश टाकला. अफजलखान आणि औरंगजेबाच्या स्वाऱ्यांपासून तसेच प्लेगच्या काळात मंदिरांचे रक्षण करण्यात बडव्यांनी महत्त्वाची भूमिका बजावल्याचे त्याने सांगितले. काँग्रेसच्या काळात मंदिरांवरून झालेल्या वादाचा संदर्भ देत, भाजपला पाठिंबा देऊनही अशा वक्तव्यामुळे दुःख झाल्याचे त्याने नमूद केले.

यावर आशिष शेलार यांनी आपली भूमिका स्पष्ट केली. आपण बडव्यांच्या विरोधात बोललो नसून, राज ठाकरे यांनी जेव्हा मनसेची स्थापना करताना माझ्या विठ्ठलाला बडव्यांनी घेरले आहे असे म्हटले होते, तेव्हा ते कोणत्या बडव्यांबद्दल बोलत होते, याचा खुलासा राज ठाकरेंनी करावा, असे आव्हान आपण दिल्याचे शेलारांनी स्पष्ट केले. आपण राज ठाकरेंच्या त्या वक्तव्याची केवळ आलोचना करत होतो, असेही त्यांनी नमूद केले.