… म्हणून आता मंदिरात वणवण फिरतायत! आशिष शेलारांचा ठाकरे बंधूंवर निशाणा

भाजप नेते आशिष शेलार यांनी महाराष्ट्र नवनिर्माण सेना अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्यावर जोरदार टीका केली आहे. शेलार यांनी राज ठाकरे यांच्या निवडणूक प्रक्रियेवरील विधानांना बिनडोक म्हटले. उमेदवारांना मतदारांच्या घरी जाण्यावर बंदी असल्याच्या राज ठाकरे यांच्या दाव्याला त्यांनी फेटाळून लावले. निवडणूक आयोगाने यावर स्पष्टीकरण दिले असून, हा नियम जुना असल्याचे शेलार यांनी सांगितले.

शेलार यांनी ठाकरे बंधूंनी अलीकडे एकत्र घेतलेल्या मुंबादेवी दर्शनावरही प्रश्नचिन्ह उपस्थित केले. ते म्हणाले की, हे दर्शन केवळ राजकीय स्वार्थापोटी केले गेले असून, याआधी त्यांना मुंबादेवीचा विसर का पडला होता. शेलार यांनी ठाकरे बंधूंना राजकीय अगतिकतेचे नटसम्राट संबोधले, जे पराभवाची कारणे शोधण्यासाठी नवनवीन गोष्टी करत आहेत. निवडणूक आयोगावर सातत्याने प्रश्नचिन्ह उपस्थित करण्याऐवजी निवडणुकीत न उतरण्याचा सल्लाही त्यांनी दिला.