Worli Union Dispute : भाजप-ठाकरे सेनेचा कामगार युनियनवरून राडा, वांद्र्यानंतर वरळीच्या सेंट रेजिस हॉटेलमध्ये घडलं काय?

वांद्र्यानंतर आता मुंबईतील वरळी भागात भारतीय जनता पक्ष (भाजप) आणि उद्धव बाळासाहेब ठाकरे यांच्या नेतृत्वाखालील शिवसेना गटात कामगार युनियनवरून तीव्र संघर्ष उफाळला आहे. सेंट रेजिस हॉटेलमध्ये हा वाद निर्माण झाला असून, दोन्ही पक्षांचे पदाधिकारी आमनेसामने आले. या घटनेमुळे परिसरात मोठा गोंधळ आणि घोषणाबाजी झाली. ठाकरे सेनेच्या पदाधिकाऱ्यांनी गेल्या १० वर्षांपासून सेंट रेजिस हॉटेलमध्ये त्यांच्या भारतीय कामगार सेनेचे वर्चस्व असल्याचे सांगितले. भाजपने बेकायदेशीरपणे युनियन स्थापन करण्याचा प्रयत्न केल्याचा आरोप त्यांनी केला.

दुसरीकडे, भाजपच्या पदाधिकाऱ्यांनी दावा केला की, गेल्या १० वर्षांपासून कामगारांना न्याय मिळत नसल्याने ते स्वेच्छेने भाजपच्या युनियनमध्ये सामील होत आहेत. त्यांनी हॉटेल प्रशासनाशी चर्चा करून आपला बोर्ड लावण्याची भूमिका घेतली. हा प्रकार ताज लँड्स एंड हॉटेल, वांद्रे येथील घटनेसारखाच असल्याचे बोलले जात आहे. परिस्थिती हाताळण्यासाठी घटनास्थळी मोठ्या प्रमाणात पोलीस बंदोबस्त तैनात करण्यात आला होता. अखेरीस, भाजपने आपला बोर्ड हॉटेलच्या परिसरात लावला, ज्यानंतर भाजप कार्यकर्त्यांनी जल्लोष केला.