Nitesh Rane : आय लव्ह महादेव… नितेश राणेंच्या मतदारसंघात ‘त्या’ बनर्सची तुफान चर्चा, प्रकरण काय?

मंत्री नितेश राणे यांच्या कणकवली विधानसभा मतदारसंघात आय लव महादेवचे बॅनर झळकल्याने राजकीय आणि सामाजिक वर्तुळात चर्चांना उधाण आले आहे. कणकवली शहरातील भाजपच्या नवरात्र देवीच्या मंडपात हे बॅनर लावण्यात आले आहेत. नवरात्रोत्सवाच्या निमित्ताने आयोजित गरब्याच्या ठिकाणी हे बॅनर लक्ष वेधून घेत आहेत. या बॅनरमागे एक विशिष्ट पार्श्वभूमी आहे. यापूर्वी आय लव्ह मोहम्मद असे बॅनर काही ठिकाणी झळकले होते. त्यानंतर भाजप नेते नितेश राणे यांनी आपल्या ट्विटर हँडलवरून आय लव महादेव असे ट्विट करून आपली भूमिका मांडली होती.

कणकवलीतील या बॅनर्समुळे स्थानिकांमध्ये आणि राजकीय निरीक्षकांमध्ये कुतूहल निर्माण झाले आहे. निवडणुकीच्या काळात आणि सणासुदीच्या वातावरणात अशा प्रकारच्या घोषणांचा राजकीय अर्थ काढला जात आहे. भाजपच्या मंडपात हे बॅनर असल्याने पक्षाच्या स्थानिक कार्यकर्त्यांचाही याला पाठिंबा असल्याचे दिसून येत आहे. या घटनेवर पुढे काय प्रतिक्रिया येतात, याकडे सर्वांचे लक्ष लागून राहिले आहे.