Leopard Sterilisation : मोठी बातमी! कुत्रे, मांजरांप्रमाणे आता बिबट्याचीही होणार नसबंदी, बिबट्यांची दहशत अन् सर्रास वावर कमी होणार?

वनमंत्री गणेश नाईक यांनी नुकतीच माहिती दिली की, बिबट्यांच्या संतती नियमनासाठी अर्थात नसबंदीसाठी केंद्र सरकारची परवानगी मिळाली आहे. केंद्र सरकारच्या वन्यजीव विभागाने प्रजनन नियंत्रणाची ही परवानगी दिली आहे. सुरुवातीच्या टप्प्यात जुन्नर तालुक्यात बिबट्यांची नसबंदी केली जाणार आहे. वनमंत्री गणेश नाईक यांनी सांगितले की, केवळ जुन्नर विभागापुरती ही परवानगी मिळालेली असली तरी, राज्यातील इतर भागांत जिथे बिबट्यांचा उपद्रव वाढला आहे, तिथेही नसबंदीची परवानगी मिळावी अशी मागणी राज्य सरकारकडून करण्यात येणार आहे.

या संदर्भात बोलताना, बिबट्या गावांमध्ये येऊ नये यासाठी नियुक्त केलेल्या कर्मचाऱ्यांसाठी निधीची कमतरता असल्याचे माजी वनमंत्री सुधीर मुनगंटीवार यांनी नमूद केले. निधीअभावी अनेक तरुण हे काम करत नसल्याने बिबट्यांचा मानवी वस्तीतील वावर वाढत असल्याकडे त्यांनी लक्ष वेधले. देवळाली कॅम्प, पालघरमधील मोखाडा, रत्नागिरीतील राजापूर आणि सांगलीतील कुरळप येथे नुकत्याच बिबट्यांच्या दर्शनामुळे नागरिकांमध्ये भीतीचे वातावरण आहे. काही ठिकाणी बिबट्यांनी शेळ्यांवर हल्ला केल्याच्या घटनाही घडल्या आहेत.