नेत्यांचं कुटुंबकम, कार्यकर्त्यांनो घ्या भडंग! भाजप-शिंदे गटाकडून कुटुंबांना तिकीट वाटप, कार्यकर्ते नाराज
महाराष्ट्राच्या स्थानिक स्वराज्य संस्था निवडणुकीत नेत्यांच्या कुटुंबीयांना मोठ्या प्रमाणात उमेदवारी मिळत आहे. नांदेडच्या लोह्यात एकाच कुटुंबातील सहा जणांना, तर बदलापुरात १२ पती-पत्नी जोडप्यांना तिकीट मिळाले आहे. भाजप आणि शिंदे गट यात आघाडीवर असून, यामुळे घराणेशाहीच्या आरोपांवरून राजकीय वर्तुळात चर्चा सुरू झाली आहे. कार्यकर्त्यांनी मोठ्या नेत्यांच्या कुटुंबियांसाठी प्रचार करावा लागणार आहे.
महाराष्ट्राच्या स्थानिक स्वराज्य संस्था निवडणुकीत राजकीय पक्षांकडून आपल्याच कुटुंबातील सदस्यांना उमेदवारी देण्याचे प्रमाण वाढले आहे. नांदेडच्या लोह्यात एकाच कुटुंबातील सहा जणांना तिकीट दिल्यानंतर आता बदलापूर नगरपालिकेतही १२ पती-पत्नी जोडप्यांना उमेदवारी मिळाली आहे. यामध्ये भाजप आणि शिंदे गट आघाडीवर आहेत.
बदलापुरात भाजपने राजेंद्र घोरपडे यांना नगरसेवक तर त्यांच्या पत्नी रुचिता घोरपडे यांना नगराध्यक्ष पदाचे तिकीट दिले आहे. याचप्रमाणे शिंदे गटाने वामन म्हात्रे यांना नगरसेवक आणि पत्नी वीणा म्हात्रे यांना नगराध्यक्ष पदाची उमेदवारी दिली आहे. जळगाव जिल्ह्यातही दोन विद्यमान आमदार, दोन मंत्री आणि एका माजी आमदाराच्या पत्नी तसेच एका आमदाराच्या मुलीला नगराध्यक्ष पदाची उमेदवारी मिळाली आहे. पाचोरा येथे आमदार किशोर पाटील यांच्या पत्नी सुनिता पाटील आणि माजी आमदार दिलीप वाघ यांच्या पत्नी सुचिता वाघ यांच्यात नगराध्यक्ष पदासाठी लढत आहे. या घराणेशाहीवरून भाजपवरही टीका होऊ लागली आहे.
