Dharamrao Baba Atram : चारवेळा मंत्री, आता पुन्हा वर्षभरात मंत्री होणार… दादांच्या नेत्यानं दिले मंत्रिमंडळात फेरबदलाचे संकेत

राष्ट्रवादी काँग्रेसचे नेते धर्मराव बाबा आत्राम यांनी आपण येत्या वर्षभरात पुन्हा मंत्री होणार असल्याचा विश्वास व्यक्त केला आहे. गडचिरोलीतील एका सभेत बोलताना आत्राम यांनी हे संकेत दिले. त्यांनी मंत्रिमंडळात फेरबदल होण्याची शक्यताही अप्रत्यक्षपणे सूचित केली. यावेळी बोलताना धर्मराव बाबा आत्राम यांनी आपला राजकीय अनुभव कथन केला.

ते म्हणाले की, मी पाच वेळा निवडून आलो आहे आणि चार वेळा मंत्री म्हणून काम केले आहे. आता पाचव्यांदा निवडून आल्यानंतर, येत्या एक वर्षात पाचव्यांदा मंत्री बनणार हे निश्चित आहे. याबाबत कोणतीही शंका नाही, असे त्यांनी स्पष्ट केले. या सभेतून अजित पवारांच्या नेतृत्वाखालील राष्ट्रवादी काँग्रेस स्वबळावर पुढे जाण्याची तयारी करत असल्याचेही दिसून आले.

आत्राम यांनी वनपट्ट्यांच्या मुद्द्यावरही भाष्य केले. आपण 50-50 वर्षांपासून शेती करत असलेल्या कास्तकरांना अद्याप वनपट्टे मिळालेले नाहीत. हे सर्व काम पूर्ण करण्यासाठी वेळ लागतो. जनतेचा प्रतिनिधी म्हणून केवळ बसून न राहता, लोकांची कामे करणे हे आपले कर्तव्य असल्याचे धर्मराव बाबा आत्राम यांनी नमूद केले.